27 May 2020, Çərşənbə

 Naxçıvan şəhərində yerləşən “Naxçıvanqala” Tarix-Memarlıq Muzey Kompleksində martın 19-dan başlayan Novruz şənliklərində yüzlərlə muxtar respublika sakini, xarici vətəndaşlar və turistlər iştirak edirlər.

Biz də bu bayram şənliklərində iştirak edən insanlarla həmsöhbət olub, onların təəssüratlarını öyrəndik.

İran İslam Respublikasının vətəndaşı Həsən Rəhimi muxtar respublikamıza ilk dəfədir ki, Novruz bayramı ərəfəsində səfər etdiyini bildirib. O qeyd etdi ki, bayramı şənlilkəri burada fərqli və çox möhtəşəm keçirilir. El şənliklərindəki milli rəqslər, musiqilər məni valeh etdi. Bir sözlə Naxçıvanda insanlarda olan ruh yüksəkliyi, adət-ənənələrə bağlılıq, milli dəyərlərə ehtiram çox yüksək səviyyədədir. Hər il davamlı olaraq Naxçıvanda keçirilən Novruz şənliklərində iştirak edəcəyəm.

Digər həmsöhbətimiz isə Novruz şənliyində iştirak etmək üçün Naxçıvana Bakıdan səfər edən Elmira Axundovadır. Müsahibimin dediklərindən: - Oğlum hərbiçidir. Naxçıvanda hərbi qulluq etdiyi üçün Naxçıvana tez-tez səfər edirəm. Burada keçirilən “Göycə”, “Arıçılıq məhsulları-bal”, “Ailə təsərrüfatı məhsulları”  və digər festivallarda iştirak etmişəm. Növbəti dəfə nəvələrimlə birlikdə Naxçıvanda Novruz şənliyində iştirak etmək üçün gəldim. Həm ürəyimcə mənalı bayram istirahəti edib dincəlmək, həm bu qədim diyarı nəvələrimə də tandıb sevdirmək istəyirəm. Bayram şənlikləri yüksək səviyyədə, çox möhtəşəm  təşkil olunub. Burada milli adət-ənənələrimiz nümayiş etdirilən guşələr çox diqqətimi çəkdi və sevindirici haldır ki, milli dəyərlərimiz lazımınca təbliğ olunur.

Digər müsahibimiz Türkiyə vətəndaşı, Səriyyə Ünsal da bayram təssüratlarını bizimlə bölüşdü. O dedi ki, İğdır şəhərindən Novruz şənliyində iştirak etmək üçün gəlmişəm. Bizdə də Novruz bayramı qeyd olunur, lakin Naxçıvandakı kimi ümumxalq şənliyi səviyyəsində keçirilmir. Burada çox yüksək bayram əhval-ruhiyyəsi var. İnsanlar bir-birilərini təbrik edib, bayramlaşırlar. Qeyd etdiyim kimi bu bayram Türkiyədə də keçirilsə də, Naxçıvanda bayram ab-havası daha fərqli hiss olunur, xüsusilə kütləvi xarakter daşıyır. Həmsöhbətimiz bayramla bağlı adət-ənənələri, bişirilən milli yeməkləri çox bəyəndiyini söylədi.                 

Hollandiyada yaşayan həmyerlimiz Zeynallı Yasin də xalqımız üçün əziz sayılan Novruz bayramını həmvətənləri ilə birgə keçirmək  üçün öz dogma yurduna gəlib. O bildirdi ki, dünyanın harasında yaşamağımızdan asılı olmayaraq, bu bayramı həmişə qeyd etməyə çalışırıq. Təbii ki, Hollandiyada bu qədər geniş şəkildə qeyd edə bilmirik. Elə buna görə öz ailəmlə birlikdə bu bayram doğma diyarımıza qayıtmışıq. Artıq üç gündür Naxçıvandayıq. Burada hər bir şey çox gözəldir. Naxçıvanın tanınmaz dərəcədə dəyiçilən, gözəlləşən siması, yurdumun insanlarının çöhrəsindəki xoşbəxt təbəssüm, əsl bayram ovqatı, bolluq-bərəkət məni nə qədər sevindirdi. Keçirilən şənliklər, yaşadılan adət-ənənə uşaqlığımı yadıma saldı. Qızımla birlikdə burada nümayiş olunan milli rəqslərə, Novruz personajlarına baxdıq. Muxtar respublikada fəaliyyət göstərən istehsal və xidmət müəssisələri tərəfindən ictimai-iaşə xidmətindən də çox razı qaldım. Çoxdandır dadmadığım bayram şirniyyatlarından məmnuniyyətlə, ləzzətlə daddım.

İran İslam Respublikasının vətəndaşı Əmirəli Vəlizadə isə qeyd etdi ki, artıq 4-cü ildir ki, Novruz şənliyində iştirak etmək üçün Naxçıvana gəlir. Bura hər gəlişində şəhərin daha da gözəlləşdiyini, abadlaşdırıldığını görür. Naxçıvan olduğum şəhərlər arasında təmizliyi, gözəlliyi ilə seçilir. Qədim el bayramı olan Novruz İranda da qeyd edilir. Lakin Azərbaycanda, eləcə də Naxçıvanda bu bayram daha böyük el şənlikləri ilə müşayiət olunur. Hər kəs bayrama xüsusi olaraq hazırlaşır. Buna görə də hər il bu bayramda iştirak edirəm və demək olar ki, buraya hər səfərimdə mənim tövsiyəmlə 4-5 ailə ilə birlikdə gəlirik. Deyə bilərəm ki, bayramı burada keçirmək, el çənliklərində iştirak etmək üçün  ölkəmizdən çoxlu sayda turist gəlir.

 Naxçıvan Dövlət Universitetinin Tibb fakültəsinin tələbələri --  Nigeriya Respublikasının vətəndaşları Joseph Okpamen və Scott Enes də bildirdilər ki, bir neçə ildir Naxçıvanda təhsil alırlar. Öz ölkələrində qeyd edilmədiyindən Novruz bayramı haqqında təəssüratlarımız demək olar ki yox idi. Burada olduğumuz müddətdə şən əhval-ruhiyyə ilə keçirilən bu bayramda rastlaşdığım adət-ənənələr, bir-birindən ləziz təamlar bu ölkənin nə qədər zəngin mədəniyyətə malik olduğunu göstərir. Bu bayram çox gözəldir. Küsülülər barışır, hamı bir-birini təbrik edir. Burada yaşayan insanlar çox istiqanlı, qonaqpərvərdir. Biz əcnəbi tələbələrə də burada bayramı qeyd etmək üçün lazımı şərait yaradılıb və bizə yaradılan şəraitə görə öz təşəkkürümüzü bildiririk. Ayrıca naxçıvanlı dostlarımız Novruzda hər il bizi mütləq evlərinə dəvət edir, onlarlabirlikdə, bayramı ləziz şirniyyatlarınızla,  dadlı milli yeməklərinizlə zəngin süfrə arxasında, xoş əhval-ruhiyyə ilə qarşılayırıq.

            Göründüyü kimi, xalqımızın çoxəsrlik milli dəyərlərini yaşadan, milli birlik, hümanizm, təbiətə, Bahar fəslinə sevgi kimi yüksək ali dəyərlər aşılayan Novruz bayramı həm də dünyəvi dəyər kəsb edir. Bu bayram muxtar respublikamızda xüsusi təmtəraqla, kütləvi çəkildə, ruh yüksəkliyi ilə qeyd olunur.  İnsanların qonaqpərvərliyi, bolluq-firavanlıq və sabitlik, qədim adət-ənənlərimizin və zəngin milli mətbəximizin təbliği isə  Novruz bayramını bu qədim diyarda keçirmək istəyən turistlərin sayının ilbəil artmasına səbəb olur.

 Pərviz HACILI

ARXİV

May 2020
Be Ça Ç Ca C Ş B
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

MÜƏLLİFLƏR

KEÇİDLƏR