Muxtar respublikada uşaqların qanunla müəyyən olunmuş hüquq və mənafelərinin müdafiəsi, sağlamlıqlarının qorunması, təhsil alaraq layiqli vətəndaş kimi formalaşması, asudə vaxtlarının səmərəli təşkil olunması 2018-ci ildə də diqqət mərkəzində saxlanılmış, bu sahədə ardıcıl tədbirlər görülmüşdür. Valideynlərini itirmiş və ya valideyn himayəsindən məhrum olmuş 10 uşaq ötən il qəyyumluq və himayəyə, 11 uşaq övladlığa verilmişdir. Valideynlərini itirmiş və ya valideyn himayəsindən məhrum olmuş, qaçqın və məcburi köçkün, sağlamlıq imkanları məhdud, şəhid və aztəminatlı ailələrdən olan 720 uşağa isə bayram günlərində hədiyyə və sovqatlar verilmiş, 15 sentyabr – Bilik Günü ilə əlaqədar bu kateqoriyadan olan 394 uşaq məktəbli paltarı, dərs ləvazimatları və qış geyimi ilə təmin olunmuşdur.

Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası nəzarətdə saxlanılmış, sağlamlıq imkanları məhdud uşaqlar məktəbəqədər, ümumtəhsil, peşə və məktəbdənkənar təhsil müəssisələrinə cəlb edilmişlər. Hazırda ümumtəhsil məktəblərində müvafiq kateqoriyadan olan 963, Gözdən Əlil Uşaqlar üçün Xüsusi İbtidai Məktəbdə 8, Distant Tədris Mərkəzində 22 uşaq təhsil alır. 2018-2019-cu tədris ilində 42 uşaq məktəbəqədər təhsil müəssisələrində, 10 uşaq Naxçıvan Şəhər Körpələr Evi və Ailələrə Dəstək Mərkəzində, 9 uşaq ümumtəhsil məktəblərində fəaliyyət göstərən məktəbəqədər hazırlıq qruplarında, nitq qüsuru olan 149 uşaq isə Məhdud Fiziki İmkanlılar üçün Naxçıvan Regional İnformasiya Mərkəzinin defektoloji bölmələrində tədrisə cəlb edilmişdir.

Dünən Naxçıvan şəhər 5 nömrəli uşaq bağçasında məktəbəqədər hazır­lıq qruplarında olan 5-6 yaşlı uşaqlar arasında “Ağıllı uşaq” əyləncəli intellektual oyunu keçirilib.
Oyun başlanmazdan əvvəl uşaqların iştirakı ilə hazırlanmış idmanın müxtəlif növlərini əks etdirən kompozisiya nümayiş olunub. Daha sonra Gənclər və İdman Nazirliyinin əməkdaşı İlahə Haqverdiyeva, Ailə, Qadın və Uşaq Problemləri üzrə Dövlət Komitəsinin əməkdaşı Gülər Əhmədova və Naxçıvan Şəhər İcra Hakimiyyətinin əməkdaşı Orxan Məhərrəmov çıxış edərək bildiriblər ki, tədbirin keçirilməsində məqsəd uşaqların asudə vaxtlarının səmərəli təşkili, onların əqli qabiliyyətlərinin və məntiqi düşüncələrinin inkişaf etdirilməsidir.
İki mərhələdən ibarət olan oyunda 4 komanda iştirak edib. Birinci mərhələdə uşaqlar butona basmaqla 55 sualı, ikinci mərhələdə isə onlara təqdim olunan 5 şəkilli sualı cavablandırıblar.
Sonda daha çox suala düzgün cavab verən “Günəş” komandası I yerə, “Ulduz” komandası II, “Ay” və “Bulud” komandaları isə III yerlərə çıxıblar. Qaliblərə təşkilatçılar tərəfindən diplom, fəxri fərman və rəngli kitablar təqdim olunub.
Qeyd edək ki, 20 uşağın iştirak etdiyi intellektual oyun Gənclər və İdman Nazirliyinin, Ailə, Qadın və Uşaq Problemləri üzrə Dövlət Komitəsinin, Naxçıvan Şəhər İcra Hakimiyyətinin və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin birgə təşkilatçılığı ilə keçirilib.

Ceyhun MƏMMƏDOV

Muxtar respublikamızda həyatın bütün sahələrini əhatə edən genişmiqyaslı quruculuq işləri, ilk növbədə, insanların rahat yaşamasına və firavanlığına hesablanıb. Təqdirəlayiq hallardan biri isə son illərdə bölgələrimizdə hərtərəfli şəraitə malik mərasim evlərinin inşa olunmasıdır.

Qeyd etmək lazımdır ki, əvvəllər insanlar yas mərasimlərini keçirərkən məişət çətinlikləri ilə üzləşir, ilin yağıntılı dövrlərində qayğılar daha da çoxalırdı. Lakin bu xeyirxah addımdan sonra vəziyyət köklü surətdə dəyişilib. İndi ilin bütün fəsillərində yas mərasimləri şəriət qaydalarına uyğun rahat şəkildə həyata keçirilir.
Muxtar respublikanın ən böyük rayonlarından sayılan Şərurda da mərasim evlərinin tikintisi diqqətdə saxlanılır. Belə ki, ötən dövr ərzində rayonun Qarahəsənli, Arbatan, Zeyvə, Ərəbyengicə, Xanlıqlar, Muğanlı, Tumaslı kəndlərində yeni mərasim evləri tikilərək kənd sakinlərinin istifadəsinə verilib. Hazırda rayonun Qorçulu, Siyaqut, Qarxun, Sərxanlı, Püsyan, Muğancıq-Müslüm, Xanlıqlar kənd­lərində mərasim evlərinin inşası aparılır.
Onu da xatırlatmaq yerinə düşər ki, muxtar respublikada yas və dəfn mərasimlərinin dinimizin qaydalarına uyğun şəkildə keçirilməsi ölkə səviyyəsində nümunə hesab edilir. Şərur rayonunda da bu qaydalara ciddi əməl olunur.

 Nail ƏSGƏROV

“2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrası bu qəbildən olan uşaqların təhsilə cəlbinin davamlılığını təmin etməklə yanaşı, onların inklüziv və məsafədən təhsil imkanlarının genişlənməsinə və cəmiyyətə inteqrasiyasına əlverişli şərait yaradıb.
Bu tədbirlərin davamı olaraq Naxçıvan Muxtar Respublikası Əmək və Əhalinin Sosial Müdafiəsi, Təhsil və Rabitə nazirliklərinin birgə təşkilatçılığı ilə fevral ayının 13-də Şərur rayonunun Xələc kəndindən sağlamlıq imkanları məhdud daha bir uşaq distant tədrisə cəlb edilib. Bu məqsədlə onun yaşadığı mənzilə rabitə və internet xətləri çəkilib, müvafiq texniki avadanlıqlar quraşdırılıb. Bununla yanaşı, sağlamlıq imkanları məhdud uşaq Mövlan Heydərli zəruri dərs ləvazimatları, tədris vəsaitləri, məktəbli geyimi ilə təmin olunub, ona tədris prosesinin gedişinə uyğun müvafiq təlimatlar verilib. Bununla da muxtar respublikada distant tədrisə cəlb edilmiş sağlamlıq imkanları məhdud uşaqların sayı 23-ə çatıb.
Mövlan Heydərlinin valideynləri göstərilən qayğıya görə minnətdarlıqlarını bildiriblər.
Qeyd edək ki, aztəminatlı olması nəzərə alınaraq sözügedən ailə ötən il Əmək və Əhalinin Sosial Müdafiəsi Nazirliyi tərəfindən özünüməşğulluq üzrə dövlət proqramına da cəlb edilib.

Naxçıvan Muxtar Respublikası
Əmək və Əhalinin Sosial Müdafiəsi Nazirliyinin mətbuat xidməti

Naxçıvan Muxtar Respublikasında ailə, qadın və uşaq hüquqlarının qorunması, həmçinin qəbul edilmiş dövlət proqramlarından irəli gələn vəzifələrin icrası diqqətdə saxlanılır, müvafiq tədbir və müsabiqələr keçirilir.
Ötən ay Culfa rayonunun Dizə kəndində “Reproduktiv sağlamlıq və ailə dəyərləri” mövzusunda tədbir keçirilmiş, 205 maarifləndirici broşür paylanılmışdır. Aztəminatlı ailələrin hüquqlarının qorunması, sosial problemlərinin öyrənilməsi və həll edilməsi diqqətdə saxlanılmış, 1 ailəyə müvafiq köməklik göstərilmişdir.