03 Avqust 2020, Bazar ertəsi

Naxçıvan Qarnizonu Qoşunlarında növbəti ixtisas hazırlığı kurslarının başa çatması münasibətilə buraxılış mərasimi ­keçirilib.
Mərasimdə əvvəlcə Azərbaycan Respublikasının Dövlət Himni səsləndirilib.
Tədbirdə çıxış edən polkovnik Mehman Gülməmmədov kurslar zamanı kursantların müasir silah nümunələrindən döyüş şəraitində bacarıqla istifadə etmək vərdişlərinə yiyələnmələri üçün müxtəlif növ atıcı və iriçaplı silahlardan praktik atışların, bütün növ zirehli tank texnikalarından sürücülük və atış çalışmalarının yerinə yetirildiyini bildirib.

Məzunlar adından çıxış edən Toğrul Kərimov söz verib ki, dövlət qayğısından və xalq-ordu birliyindən güc alaraq xidmət yerlərində peşəkar hərbçi kimi Vətənin müdafiəsində ayıq-sayıq dayanacaqlar.
Naxçıvan Qarnizonunun rəisi, general-polkovnik Kərəm Mustafayev muxtar respublikamızda Vətənə sədaqətli, peşəkar hərbçi kadrların hazırlandığı kursları uğurla başa vuran gənclərimizin gələcəkdə xidmətlərini nümunəvi şəkildə davam etdirəcəklərini deyib.
General-polkovnik Kərəm Mustafayev zabit, gizir, müddətdən artıq həqiqi hərbi xidmət hərbi qulluqçusu və qadın hərbi qulluqçu kurslarını başa vuran və hər zaman dövlət qayğısını üzərlərində hiss edən məzunları təbrik edərək gələcək xidmətlərində uğurlar arzulayıb.
Çıxışların ardından məzunlara rütbə, sertifikat və hədiyyələr təqdim edilib, nümunəvi xidməti ilə fərqlənən hərbi qulluqçular mükafatlandırılıblar.
Məzunların ixtisaslarına uyğun vəzifələrə təyin olunmaları ilə bağlı imzalanmış əmrlər şəxsi heyətə çatdırılıb, xatirə lövhələrinə buraxılış emblemləri vurulub və tribuna önündən təntənəli keçid olub.

Nəriman NƏCƏFOV