25 Oktyabr 2021, Bazar ertəsi

Ağdam Olimpiya İdman Kompleksində ümummilli lider Heydər Əliyevin xatirəsinə həsr olunan universal döyüş növü üzrə turnir keçirilib.
Turnirdə Naxçıvan Muxtar Respublikası Kikboksinq Federasiyasının idmançıları da mübarizə aparıb və mükafatçılar sırasına düşüblər. Belə ki, 35 kiloqram çəki dərəcəsində Fərid Orucov, 45 kiloqram çəki dərəcəsində Sadiq Kərimov, Uğur Əliyev, Rəhim Əşrəfov bütün rəqiblərinə qalib gələrək turnirin baş mükafatını qazanıblar. Sərdar Qurbanov (35 kiloqram), Əbülfəz Cəfərov (40 kiloqram), İbrahim Əlizadə (50 kiloqram), İsmayıl Hüseynzadə (50 kiloqram), Məhəmmədəli Qasımov (55 kiloqram) və Səhət Əsədov (60 kiloqram) yalnız final görüşlərində məğlub olaraq ikinci yerlə kifayətləniblər. İlqar Səfərli (30 kiloqram), Nurəddin Əliyev (30 kiloqram), Rəhim Quluzadə (35 kiloqram), Şahin Səfərli (45 kiloqram) və Fuad Quliyev (75 kiloqram) isə üçüncü olublar.
Qaliblərə təşkilatçıların diplom və medalları təqdim edilib.

Ceyhun Məmmədov

2006-2007-ci il təvəllüdlü oğlan və qız atletlər arasında keçirilən kross qaçışı üzrə muxtar respublika birinciliyinə yekun vurulub. Naxçıvan Muxtar Respublikası Gənclər və İdman Nazirliyi ilə Atletika Federasiyasının birgə təşkil etdiyi birincilikdə 100-ə yaxın atlet qüvvəsini sınayıb.
Birinciliyin mükafatlandırma mərasimində çıxış edən Naxçıvan Muxtar Respublikası Atletika Federasiyasının sədri Rəhman Məmmədov bildirib ki, bu gün muxtar respublikanın bütün ali təhsil ocaqlarında uşaq, yeniyetmə və gənclərin bu sahə ilə məşğul olmaları üçün hər bir şərait yaradılıb. Məhz bunun nəticəsidir ki, idmançılarımız keçirilən ölkədaxili birinciliklərdə uğurla çıxış edərək böyük nailiyyətlər qazanır. Bu qələbələr həm də digər idmançılar üçün əlavə stimuldur. Uğurlu çıxışlar yeniyetmə və gənclərin idmana cəlb edilməsində müstəsna rol oynayır. Rəhman Məmmədov idmana və idmançılara göstərilən diqqət və qayğıya görə muxtar respublika rəhbərinə minnətdarlığını bildirib.

Ardını oxu...

Naxçıvan şəhərindəki 16 nömrəli tam orta məktəbin mini futbol meydançasında dostluq və idman əlaqələrinin gücləndirilməsi məqsədilə Naxçıvan Şəhər və Şərur Rayon Uşaq-Gənclər İdman məktəblərinin 10 və 11 yaşlılardan ibarət komandaları arasında minifutbol üzrə yoldaşlıq görüşü keçirilib.
Yoldaşlıq görüşünün keçirilməsində məqsəd uşaq futbolunun inkişafına töhfə vermək, oyunçuların ustalıq səviyyəsini yüksəltmək və bu növdə kütləviliyə nail olmaq idi. Yarış Naxçıvan Şəhər və Şərur Rayon Gənclər və İdman idarələri, Təhsil şöbələri və Uşaq-Gənclər İdman məktəbləri tərəfindən birgə təşkil edilmişdir.

Ardını oxu...

Cari ildə Milli Komandaların Məşq Mərkəzində başlayan qapıçılar üzrə məşqçilər üçün Avropa Futbol Birliyi İttifaqının (UEFA) “B” kateqoriyalı məşq­çi kursu yekunlaşmaq üzrədir.
UEFA-dan Mart Poom və yerli təlimatçılar Faiq Əzizov, Üzeyir İbrahimov və Vitali Kovalyovun rəhbərliyi ilə keçirilən kursda Naxçıvan Futbol Federasiyasının qapıçılarla iş üzrə koordinatoru, eyni zamanda “Araz-Naxçıvan”ın qapıçı məşqçisi Amil Ağacanov da iştirak edib. Son modul başa çatdıqdan sonra kursda iştirak edən məşqçilərdən nəzəri və praktik imtahanlar götürülüb. Naxçıvan Muxtar Respublikasına gələn Faiq Əzizov və Üzeyir İbrahimov komandanın məşq prosesini, eyni zamanda qapıçı-məşqçi Amil Ağacanova imtahanda verilən tapşırıqları praktik olaraq izləyiblər. Müvafiq qeydlərdən sonra Naxçıvan Muxtar Respublika Stadionunun iclas zalında nəzəri imtahan keçirilib. İmtahan nəticələri növbəti ay açıqlanacaq.
İmtahandan sonra Faiq Əzizovun fikirlərini öyrəndik: “Burada olarkən komandanın, eləcə də Futbol Federasiyasının məşq bazaları ilə tanış oldum, məşqi izlədim. Hər şey mükəmməl təşkil olunub. Naxçıvanda futbol komandalarının məşq etməsi üçün hər cür şərait yaradılıb. Bundan gənc məşqçilər, eyni zamanda futbola yeni qədəm qoyan uşaq və yeniyetmələr maksimum yararlanmalı, gələcək karyeralarını sağlam bünövrə üzərində qurmalıdırlar. Uzun zamandır, Naxçıvana gəlmirdim. Son 20 ildə bura tam olaraq müasir standartlara cavab verəcək şəkildə quraşdırılıb”.
Qeyd edək ki, imtahanı uğurla başa vuran məşqçilərə UEFA-nın “B” kateqoriyalı məşqçi lisenziyası veriləcək.

- Ceyhun MƏMMƏDOV

Naxçıvan Muxtar Respublika Stadionunda “Zərərli vərdişlərə yox deyək, həmişə sağlam olaq!” devizi altında Naxçıvan şəhər tam orta məktəblərinin atletləri arasında atletikanın kross qaçışı üzrə şəhər birinciliyi keçirilib.
Naxçıvan Şəhər Gənclər və İdman İdarəsi, şəhər Təhsil Şöbəsi və Uşaq-Gənclər İdman Məktəbinin təşkilatçılığı ilə keçirilən birincilikdə 60 qız və oğlan iştirak edib.

Ardını oxu...

Oktyabrın 13-də Azərbaycan Milli Paralimpiya Komitəsinin stolüstü tennis üzrə milli komandasının baş məşqçisi Ruqiyyə Qubuşova və məşqçi Əkbər Qubuşovun iştirakı ilə muxtar respublikada stolüstü tennis ilə məşğul olan paralimpiyaçılar üçün təlim keçirilib. Təlimdə iştirakçılara müxtəlif məşq prosesləri haqqında müvafiq tövsiyələr verilib.
Naxçıvan Muxtar Respublikası Paralimpiya Federasiyasının sədri Nicat Babayev təlim-məşq prosesini izləyib, idmançıların qayğıları ilə maraqlanıb.
Sonda Azərbaycan Milli Paralimpiya Komitəsinin stolüstü tennis üzrə uşaq milli komandasının baş məşqçisi Ruqiyyə Qubuşovaya xatirə hədiyyəsi və təşəkkürnamə təqdim olunub.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikasında fəaliyyət göstərən ali və orta ixtisas təhsili müəssisələri tələbələrinin oğlan komandaları arasında basketbol üzrə muxtar respublika birinciliyi keçirilib.
Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi birincilikdə 6 komanda olimpiya sistemi üzrə mübarizə aparıb.

Ardını oxu...

Uzunoba Təlim-Məşq İdman Kompleksinin inzibati binasında Azərbaycan Həvəskar Futbol Federasiyasının prezidenti, Azərbaycan Region Liqasının vitse-prezidenti Rüfət Əmirovla görüş keçirilib. Görüşdə Naxçıvan Futbol Federasiyasının (NFF) sədr müavini Sakit Rzayev, federasiyasının qapıçılarla iş üzrə koordinatoru, “Araz-Naxçıvan” Peşəkar Futbol Klubunun qapıçı məşqçisi Amil Ağacanov iştirak ediblər.

Ardını oxu...

Futbolun təbliği, kütləviliyinin artırılması, istedadlı gənclərin üzə çıxarılması məqsədilə “Araz-Naxçıvan” Peşəkar Futbol Klubunun nəzdində fəaliyyətə başlayacaq “Araz-Naxçıvan” futbol məktəbi layihəsi çərçivəsində daha bir tədbir keçirilib.
Naxçıvan Muxtar Respublikası Gənclər və İdman, Təhsil nazirlikləri və Naxçıvan Futbol Federasiyasının təşkilatçılığı ilə Naxçıvan şəhərindəki 7 nömrəli tam orta məktəbdə keçirilən tədbirdə şəhər ümumtəhsil məktəblərində fiziki tərbiyə dərslərini tədris edən müəllimlər iştirak ediblər.

Ardını oxu...

Naxçıvan Muxtar Respublikasında futbolun kütləvi hal alması üçün məqsədyönlü addımlar atılır, müvafiq tədbirlər həyata keçirilir. Bu idman növünün təbliği və kütləviliyinin artırılması, istedadlı və perspektivli gənclərin üzə çıxarılması məqsədilə “Araz-Naxçıvan” Peşəkar Futbol Klubunun nəzdində “Araz-Naxçıvan” futbol məktəbinin fəaliyyətə başlaması da həmin tədbirlərin davamıdır. 5-15 yaş arası uşaqların iştirak edəcəyi məktəbdə UEFA-nın futbol təhsili proqramından istifadə olunacaqdır.

Ardını oxu...

Azərbaycanın Mərkəzi Ordu İdman Klubunun heyətində karyerasını davam etdirən dəri əlcək sahibimiz Rusiyanın paytaxtı Moskva şəhərində keçirilən boks üzrə hərbçilərin 58-ci Dünya Çempionatında mubarizə aparıb.
İlk dəfə olaraq belə böyük turnirdə 60 kiloqram çəki dərəcəsində rinqə çıxan idmançımız bürünc medal qazanıb. 8 gün davam edən mundialda Tayfur Əliyev yəmənli, braziliyalı və iranlı rəqiblərini məğlub edərək yarımfinala yüksəlib. Ancaq boksçumuz yüksək hərarəti olduğu üçün həkimlərin rəyinə əsasən rinqə çıxmaqdan imtina edib. Nəticədə, texniki məğlubiyyət alan idmançımız dünya çempionatında bürünc medal qazanıb.
Sonda idmançımız təşkilatçılar tərəfindən mükafatlandırılıb.

 Ceyhun MƏMMƏDOV

İlham Əliyev adına Olimpiya İdman Kompleksində qızlardan ibarət voleybol komandaları arasında Naxçıvan Muxtar Respublika açıq birinciliyinə yekun vurulub.
Yarışa şəhər və rayonlardan, ümumilikdə, 9 komanda qatılıb. Dairəvi sistem üzrə iki yarımqrupda oynanılan birincilikdə yüksək göstəriciyə nail olan 4 komanda yarımfinal mərhələsində mübarizəyə davam edib. Bu mərhələni qalib kimi tamamlayan “Sədərək” və “Culfa” komandaları həlledici final görüşündə bir-birinə rəqib olub. Qarşılaşmada üstün oyun nümayiş etdirən sədərəkli məktəblilər birinciliyin qalibi olub. Culfa təmsilçiləri ikinci yerdə qərarlaşıb. Üçüncülük oyununda “Naxçıvan-1” ilə görüşdə qələbə qazanan “Kəngərli” bürünc medallara sahib çıxıb.

Ardını oxu...

Bakı şəhərində uşu idman növü üzrə 44 günlük Vətən müharibəsi şəhidlərinin xatirəsinə həsr olunmuş klublararası respublika turniri keçirilib. Yarışda Naxçıvan Kikboksinq Federasiyasının idmançıları da iştirak edib. Məşqçi Kəmaləddin Rzayevin rəhbərliyi altında yarışa yeddi idmançımız qatılıb. Onlardan 6-sı mükafatçılar sırasına düşməyi bacarıb.
Təmsilçilərimizdən Fərişad Süleymanlı (14 yaş, 45 kiloqram), Məmməd Məhəmmədov (13 yaş, 47 kiloqram), Enes Babayev (11 yaş, 20 kiloqram) və Əli Nəsurullayev (11 yaş, 30 kiloqram) müvafiq çəki və yaş kateqoriyaları üzrə 1-ci olublar. Turqay Həsənov (2008, 42 kiloqram) və İsməddin Rzayev (2011, 39 kiloqram) yarışı ikinci sırada yekunlaşdırıblar. Bu nəticələrlə Naxçıvan komandası turniri 4 qızıl və 2 gümüş medalla tamamlayıb.

Naxçıvan Muxtar Respublikası Gənclər və İdman Nazirliyinin
mətbuat xidməti

 

 

 

Bakı şəhərində pauerliftinq, deadlift və benç press üzrə kişilər və qadınlar arasında açıq Azərbaycan çempionatı keçirilib. Azərbaycan Respublikası Gənclər və İdman Nazirliyi ilə Pauerliftinq Federasiyası tərəfindən birgə təşkil olunan yarış 17-19 sentyabr tarixlərini əhatə edib.
Muxtar respublika idmançısı, milli komandanın üzvü Əli Əsgərov benç press növündə uğurlu nəticəyə imza atıb. Belə ki, təmsilçimiz 215 kiloqramlıq ağırlığın öhdəsindən gələrək öz çəki dərəcəsində (90 kiloqram) birinci yerə sahib çıxıb. Digər təmsilçimiz Turan Qədimli (75 kiloqram) də mükafatçılar sırasına düşüb. O, benç press yarışında 160 kiloqramlıq nəticə ilə 2-ci olub. İlk üçlükdəki idmançılara diplom, kubok və medal təqdim edilib.
Qeyd edək ki, Əli Əsgərov dekabr ayında Rusiyanın paytaxtı Moskva şəhərində keçiriləcək dünya çempionatında ölkəmizi təmsil edəcək.

Naxçıvan Muxtar Respublikası Gənclər və İdman Nazirliyinin
mətbuat xidməti

 

 

 

Serbiyanın paytaxtı Belqrad şəhərində Beynəlxalq Məktəb İdmanı Federasiyasının (İSSF) təşkilatçılığı ilə Dünya Məktəblilərinin İdman Oyunları keçirilib.

Ardını oxu...

Türkiyə Şahmat Federasiyanın təşkilatçılığı ilə 13-18 sentyabr tarixlərində Kırşehirdə beynəlxalq turnir təşkil olunub.

Ardını oxu...

Bakı şəhərində AFFA tərəfindən qapıçılar üzrə məşqçilər üçün UEFA-nın “B” kateqoriyalı məşqçi kursunun III modulu keçirilib.

Ardını oxu...

“Kütləvi futbol həftəsi” başa çatdıqdan sonra Uzunoba Təlim-Məşq İdman Kompleksinin inzibati binasında Azərbaycan Futbol Federasiyaları Assosiasiyasının nümayəndələri ilə görüş olub.

Ardını oxu...

Avropa Futbol Assosiasiyaları İttifaqına (UEFA) üzv olan dövlətlərdə uşaq futbolu ilə bağlı tətbiq olunan “Grassroots” proqramına əsasən “kütləvi futbol həftəsi” (Grassroots week) və “Futboldan həzz al” (Enjoy with football) layihəsinə start verilib. Naxçıvandan başlayan layihə ölkəmizin bir neçə regionunu da əhatə edəcək.
Azərbaycan Futbol Federasiyaları Assosiasiyası (AFFA), Naxçıvan Muxtar Respublikasının Gənclər və İdman, Təhsil nazirlikləri və Naxçıvan Futbol Federasiyasının birgə təşkilatçılığı ilə Uzunoba Təlim-Məşq İdman Kompleksində keçirilən festivalda 100-dək məktəbli iştirak edib. Kompleksin böyük və mini-futbol meydançalarında maraqlı və əyləncəli oyunları əhatə edən sektorlarda uşaqlar öz bacarıqlarını müxtəlif toplu oyunlarda nümayiş etdiriblər. İştirakçıların “face art”la (üz boyama sənəti) bəzənən simaları, diceyin (DJ) müşayiəti ilə səslənən dinamik musiqilər əyləncəni daha da rəngarəng edib. Sonda hər bir məktəbliyə layihəni əks etdirən futbol topları hədiyyə olunub.
Tədbirdən sonra AFFA-nın Kütləvi Futbol Departamentinin rəhbəri Fərrux İsmayılov layihə barədə fikirlərini bildirib: “Bu layihənin həyata keçirilməsində məqsəd futbolun kütləviliyini artırmaq, uşaqların və yeniyetmələrin asudə vaxtlarının səmərəli təşkili, onlarda futbola maraq yaratmaq və sağlam həyat tərzini təbliğ etməkdir. Muxtar respublikada layihəni həyata keçirmək üçün hər bir şərait var. Layihə çərçivəsində, eyni zamanda yeni kateqoriya alan futbol məşqçiləri də iştirak etdi. Ötən dövrdə olduğu kimi, bu layihədə də Gənc­lər və İdman, Təhsil nazirlikləri, eləcə də Futbol Federasiyasının təşkilatçılığı ən yüksək səviyyədə idi. Belə lahiyələr davamlı şəkildə təşkil olunacaq. Bu həm də Naxçıvan Muxtar Respublikası Gənclər və İdman Nazirliyi və Futbol Federasiyasının AFFA ilə əməkdaşlığının möhkəmlənməsi, uşaq futbolunun inkişafı yönündə atılan bir addımdır. Təşkilatçılığa görə bir daha bu layihədə əməyi keçən bir kəsə minnətdarlığımı bildirirəm”.

 Ceyhun MƏMMƏDOV

Naxçıvan Atıcılıq Mərkəzində paralimpiyaçılar arasında atıcılığın stend növü üzrə muxtar respublika açıq birinciliyi keçirilib. Yarışa qazilərimiz də cəlb olunub, ümumilikdə, 16 nəfər iştirak edib.
Nəticələrə əsasən Şəmsəddin Əsədov birinci olub. İlk üçlüyü müvafiq ardıcıllıqla Asəf Süleymanovla Elvin Quliyev tamamlayıblar.

Ardını oxu...

Ötən ay gənc nəslin vətənpərvər ruhda formalaşdırılması, intellektual bilik və dünyagörüşünün artırılması, asudə vaxtının səmərəli təşkili, muxtar respublikamızın turizm imkanlarının onlar arasında tanıdılması və təbliği məqsədilə bir sıra tədbirlər həyata keçirilib.

Ardını oxu...

 

 

 

 

 

Naxçıvan karatenin yeni “brilyant oğlanı”nı yetişdirir

         Bu ayı Azərbaycan karatesi üçün əlamətdar ay hesab etmək olar. İlk dəfə olaraq Tokyoda keçirilən Yay olimpiya yunlarına daxil edilən karate idman növündə idmançılarımız uğur qazanmaqla adlarını Azərbaycanın idman tarixinə yazdırmış oldular. Təbii ki, belə qələbə əldə edən gənc idmançılar üçün əlavə motivasiyadır – indi yüzlərlə uşaq və yeniyetmə onları özlərinə kumir seçir, bayrağımızı beynəlxalq arenalarda dalğalandırmaq istəyirlər. Bu yol onlar üçün heç də asan olmur – ağır məşqlər, təlim-məşq toplanışları, mütəmadi çıxış etdikləri dünya və Avropa çempionatları, turnirlər və ən əsası üzərlərində hiss etdikləri məsuliyyət. Sonuncu hiss, demək olar ki, idmançıların qələbəsində mühüm, müstəsna rol oynayır. Bugünkü yazımızın qəhrəmanı yaşının az olmasına baxmayaraq, bu hissi hər zaman məsuliyyətlə dərk edən, istedadlı idmançıların uğurlarını təkrarlamağı özünə yol seçən, Naxçıvan Muxtar Respublikası Karate-do Federasiyasının yetirməsi Rəşid Süleymanovdur.

Ardını oxu...

“Zərərli vərdişlərə yox deyək, həmişə sağlam olaq!” devizi ilə keçirilən yarış İlham Əliyev adına Olimpiya İdman Kompleksində reallaşıb. Naxçıvan Kikboksinq Federasiyası ilə Gənclər və İdman İdarəsi tərəfindən birgə təşkil olunan birinciliyə “Naxçıvan-1”, “Naxçıvan-2”, “Kəngərli”, “Odlar yurdu” və “Turan” döyüş klublarından, ümumilikdə, 110 idmançı qatılıb. Görüşlər 3 yaş kateqoriyasında 22 çəki dərəcəsi üzrə keçirilib.

Ardını oxu...

Finlandiyanın Tampere şəhərində keçirilən 14-15 yaşlı yeniyetmələrin və 16-17 yaşlı gənclərin 48-ci Avropa çempionatı, 21 yaşadək gənclərin isə 13-cü qitə çempionatı davam edir. Azərbaycan Avropa çempionatında 24 karateçi və 5 hakimlə təmsil olunub. Onlardan biri də Naxçıvan Karate-do Federasiyasının idmançısı, hazırda karyerasını millinin heyətində davam etdirən Rəşid Süleymanovdur.

Ardını oxu...

Naxçıvan şəhərindəki İlham Əliyev adına Olimpiya İdman Kompleksində məktəblilərin yay tətilinin səmərəli təşkili məqsədilə keçirilən kiçikyaşlı yeniyetmələr (2008-2011-ci il təvəllüdlər) arasında cüdo üzrə Naxçıvan şəhər açıq birinciliyinə yekun vurulub.

Ardını oxu...

“Zərərli vərdişlərə yox deyək, həmişə sağlam olaq!” devizi ilə keçirilən yarış Olimpiya İdman Kompleksində reallaşıb.

Ardını oxu...

Naxçıvan şəhərindəki İlham Əliyev adına Olimpiya İdman Kompleksində məktəblilərin yay tətilinin səmərəli təşkili məqsədilə Naxçıvan şəhər tam orta məktəblərində yaradılan idman klubları arasında (2007-2009-cu illər) sərbəst güləş üzrə yoldaşlıq görüşü keçirilib.

Ardını oxu...

Türkiyədə “İstiqlal Marşı”nın qəbul edilməsinin 100-cü ildönümünə həsr olunan 5-ci Çanaqqala open beynəlxalq karate turniri keçirilib.

Ardını oxu...

“Xəmsə” milli intellekt oyunu üzrə fərdi mübarizə xarakteri daşıyan yarışa 12 iştirakçı qatılıb. Oyunun keçirilmə məqsədi sağlamlıq imkanları məhdud yeniyetmələrin intellektual səviyyəsini, zehni inkişafını stimullaşdırmaq, asudə vaxtlarının səmərəli təşkilində yeni üsullar tətbiq etməkdən ibarət olub.

Yekun nəticələrə əsasən İlqar Məmmədli 6000 xallıq göstərici ilə oyunu birinci sırada tamamlayıb. Fatimə Əsədli (3600) ikinci, İradə Hüseynli (3200) isə üçüncü olub. Naxçıvan Muxtar Respublikası Gənclər və İdman, Əmək və Əhalinin Sosial Müdafiəsi nazirlikləri və “Gənclərin İntellektual İnkişaf Mərkəzi” İctimai Birliyi tərəfindən təşkil olunan yarışın sonunda iştirakçılar mükafatlandırılıblar.


Naxçıvan Muxtar Respublikası
Gənclər və İdman Nazirliyinin mətbuat xidməti

 

 

 

Rumıniyanın Yassı şəhərində qadın şahmatçıların Avropa çempionatı keçirilir.

Ardını oxu...

12 avqust – Beynəlxalq Gənclər Günü ilə bağlı təsdiq edilən tədbirlər planına uyğun olaraq şahmatı tədris edən gənc müəllimlər arasında muxtar respublika birinciliyi keçirilib. Əlamətdar günün qeyd olunması, şahmat oyununa marağın artırılması və bu sahədə kütləviliyin təmin edilməsi məqsədilə keçirilən yarışda 38 müəllim iştirak edib. İsveçrə sistemi üzrə 7 turdan ibarət mübarizənin yekununda qaliblər bəlli olub.

Ardını oxu...

İdmançı və məşqçilərin peşəkarlıq səviyyəsinin yüksəldilməsi və yeni biliklərə yiyələnməsi məqsədilə təcrübəli mütəxəssislərin muxtar respublikaya dəvət olunması məsələsi diqqətdə saxlanılır. Bu məqsədlə Naxçıvan Şəhər Uşaq-Gənclər İdman Məktəbində sərbəst güləş növü ilə məşğul olan idmançılar üçün taktiki-texniki seminar təşkil olunub. Seminara gənclərdən ibarət milli komandanın məşqçisi, beynəlxalq dərəcəli idman ustası, Əməkdar məşqçi Rövşən Hacıyev rəhbərlik edib. Tədbirdə paytaxt Naxçıvan və bölgələrdən, ümumilikdə, 60-a yaxın idmançı, o cümlədən məşqçilər iştirak ediblər.

Ardını oxu...

Naxçıvanda idmanın inkişafı və kütləviliyinin təmin edilməsi üçün görülən məqsədyönlü tədbirlər, göstərilən hərtərəfli dövlət qayğısı nəticəsində gənc və yeniyetmələrin sağlamlığımız üçün vacib olan bu sahənin müxtəlif növlərinə marağı günü-gündən artmaqdadır. Bu məqsədlə Naxçıvan Muxtar Respublikası Gənclər və İdman Nazirliyi yaradılan bütün idman federasiyaları ilə birgə fəaliyyət göstərir, bu sahədə dövlət siyasətinin tənzimlənməsini həyata keçirir. Məhz bunun nəticəsidir ki, diyarımızda müasir idman məktəbləri və idman qurğuları tikilib, ayrı-ayrı idman növləri üzrə 12 federasiya yaradılıb. Belə federasiyalardan biri də 2006-cı ildə yaradılan Naxçıvan Muxtar Respublikası Paralimpiya Federasiyasıdır. Naxçıvan Muxtar Respublikası Ali Məclisi Sədrinin diqqət və qayğısı sayəsində sağlamlıq imkanları məhdud uşaq, yeniyetmə və gənclərin bu sahəyə cəlb edilməsi üçün maddi-texniki baza möhkəmləndirilib, bu istiqamətdə bir sıra tədbirlər həyata keçirilib.


Təsdiq edilən Dövlət proqramları

Ümumiyyətlə, sağlamlıq imkanları məhdud şəxslərin cəmiyyətə inteqrasiyası, onların reabilitasiyası və sosial adaptasiyasının təmin edilməsində diqqəti cəlb edən vasitələrdən biri məhz idmandır. Muxtar respublikamızda sağlamlıq imkanları məhdud şəxslərin də idmana cəlb olunması geniş mərhələni əhatə edib. Belə ki, Paralimpiya Federasiyasının rəsmi internet saytında paralimpiyaçı idmançıların vahid məlumat bazası formalaşdırılıb, şəhər və rayonlarda olan istedadlı idmançılar daim diqqətdə saxlanılır, onların yarışlarda iştirakı təmin edilir. Federasiya Naxçıvan Muxtar Respublikası Ali Məclisi Sədrinin 2020-ci il 14 fevral tarixli Sərəncamı ilə təsdiq edilmiş “2020-2025-ci illər üçün Naxçıvan Muxtar Respublikasında idmanın inkişafına dair Dövlət Proqramı”nın və 2021-ci il 15 mart tarixli Sərəncamı ilə təsdiq edilmiş “2021-2025-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın icrasını mütəmadi olaraq diqqətdə saxlayır və bu proqramların icrası istiqamətində fəaliyyətini davam etdirir.
Federasiyanın şəhər və rayonlardakı bölmələrində mütəmadi olaraq məşqlər təmin edilir, təsdiq edilən Dövlət proqramına uyğun olaraq işlər görülür. Şərur rayon bölməsində də fiziki imkanları məhdud idmançıların məşğulluq imkanları dəstəklənir. Hazırda bölmənin 65 idmançısı var ki, onlar idmanın 7 – stolüstü tennis, boccia, üzgüçülük, futzal, voleybol, ağırlıqqaldırma və qol güləşi növləri ilə məşğul olurlar. Son zamanlar bölmənin yetirmələri keçirilən şəhər və muxtar respublika birinciliklərində, turnirlərdə uğur qazanmaqda heç də digərlərindən geri qalmırlar. Bu idmançılardan biri də stolüstü tennis üzrə keçirilən yarışların dəfələrlə mükafatçısı və qalibi olan Allahverən Səfərovdur.

İlk turnir, ilk qələbə

Paralimpiyaçı idmançılara “Kumirin hansı idmançıdır?” – sualını yönləndirdikdə, adətən, bir cavab alınır: “İlham Zəkiyev”. Lakin bugünkü qəhrəmanımız bizim zənnimizi yanıltdı. Allahverən Səfərov idmana gec başlamasının səbəbini bir məqamla qeyd edir: “İlk olaraq idman sahəsində hansı sahəni seçəcəyimi götür-qoy etdim. Səbəbi isə bir çox növləri sevməyimdir. Uşaqlıqda futbolçu və ya voleybolçu olmağı arzulayırdım. Lakin sonradan stolüstü tennis marağımı daha çox cəlb etdi və oynamağa başladım. Hobbi olaraq başladığım idmanın əvvəlcə tarixini öyrəndim, kiçik nüansları belə, nəzərdən keçirdim. İlk dəfə 2016-cı ildən başlayaraq bu növdə yarış və turnirlərdə iştirak etdim və əksəriyyətində qalib adını qazandım”.
... Söhbətimizin bu anında məşqçi-müəllim Vüqar Paşayev maraqlı fikir söyləyir: “Stolüstü tennisdə ilk addımı atmaq böyük iradə, cəsarət tələb edir ki, bunun da öhdəsindən Allahverən artıqlaması ilə gəlib”.

Məşqçi nəsihəti

Bu gün 19 yaşında olan Allahverən Səfərov 14 yaşında öz istedadı ilə Vüqar Paşayevin diqqətini cəlb edib: “2016-cı ildə keçirilən yarışda Allahverən birinci oldu və onun soyuqqanlı olması diqqətimi cəlb etdi. Bu barədə federasiyaya məlumat verildi və qısa vaxt kəsiyində o, Paralimpiya Federasiyasının üzvü oldu. Bu müddət ərzində onunla hər gün məşqlər apardıq və bu sahədə püxtələşməsi üçün əlimizdən gələni əsirgəmədik. Demək olar ki, 2017-ci ildən onunla məşğul oluram və bir dəfə də olsun məşqlərə etinasız, məsuliyyətsiz yanaşmayıb. Məhz onun bu özgüvəni bütün yarışları qalib kimi başa vurması ilə nəticələnib. Hər zaman Allahverənə sözümüz o olur ki, “nə vaxtsa, məşqçin dəyişə bilər və yaxud başqa bir yerdə məşq edə bilərsən, amma bir şeyi unutma: məsuliyyət hər zaman idmanda ən önəmli faktordur”.

Məsuliyyətli yanaşma və uğurlar

Naxçıvan Muxtar Respublikasının ictimai həyatında və yaradıcılıq sahəsində fərqlənən istedadlı yeniyetmə və gənclərin mükafatlandırılmasında “İstedadlı gənc” adına layiq görülən Allahverən Səfərovun qazandığı uğurlar çoxdur. Belə ki, dəfələrlə Şərur rayon birinciliyinin qalibi olan Allahverən stolüstü tennis üzrə keçirilən muxtar respublika birinciliyini də 5 dəfə qələbə ilə başa vurub. Naxçıvan Muxtar Respublika spartakiadasının da qalibi olan idmançımız Azərbaycan çempionatında da mübarizə aparıb. İlk dəfə qatıldığı birincilikdə qazandığı 4-cü yeri isə uğursuz nəticə saymaq olmaz. Bu, hələ növbəti yarışlar qabağı rəqiblərinə verilən bir “gözdağı” idi.

Davam edən məşqlər

Vüqar Paşayevin 4 idmançısından biri olan Allahverən Səfərov hazırda ara vermədən məşqlərini davam etdirir. Pandemiya dövründə individual olaraq çalışan idmançının fikrincə, məlum pandemiya onun oyun təcrübəsinə az da olsa, təsir göstərib: “Ötən il federasiyanın keçirəcəyi bir çox yarışlarda iştirak edəcəkdim. Eyni zamanda Azərbaycan birinciliyində də mübarizə aparacaqdım. Lakin məlum pandemiyaya görə bütün yarışlar, turnirlər təxirə salındı. Təbii ki, bu biz idmançılara daha çox təsir etdi. Güclü məşqlərdən sonra yarışlarda iştirak etmək və qələbə qazanmaq istəyirsən, ancaq belə ara olduqda oyun təcrübən azalır. Düzdür, bu dövrdə məşqçilər, federasiya rəsmiləri bizimlə mütəmadi olaraq maraqlanırdı. Hazırda Şərur Rayon Gənclər və İdman İdarəsinin tennis zalında məşqlərimiz davam edir. Məşqlərə ciddi yanaşıb qarşıdakı yarışlarda uğurlarımı yeniləmək istəyirəm”.

İdman, mütaliə və ya Allahverənin ürək sözləri

İdman mənim yeganə işimdir və işimi çox sevirəm. Bununla yanaşı, həm də mütaliə etməyə böyük önəm verirəm. Pandemiya dövründə məşqlərlə yanaşı, daha çox kitab oxuyur, eyni zamanda qəbul imtahanlarına hazırlaşırdım. Nəticə olaraq, yüksək bal toplayıb, Azərbaycan Dövlət Neft və Sənaye Universitetinə qəbul oldum. İdmana hər zaman muxtar respublikamızda qayğı ilə yanaşırlar. Məhz bunun nəticəsidir ki, biz idmançılar keçirilən bütün yarışlarda uğur qazanıb Naxçıvan idmanına az da olsa, töhfəmizi verməyə çalışırıq. Göstərilən diqqət və qayğıya görə muxtar respublika rəhbərinə idmançılar adından minnətdar­lığımı bildirirəm.

Nəticə

“İstedadlı gənc” adına layiq görülən 19 yaşlı Allahverən Səfərovu qarşıda uğurlu karyera gözləyir – bunu tam əminliklə deyə bilərik. Bəlkə də, gələcəyin olimpiya çempionu yetişir?! Səbəbi isə çox sadədir: məsuliyyət, ən əsası isə sağlamlıq imkanları məhdud insanların tibbi bərpası, onların reabilitasiyasına şəraitin yaradılması, bədən tərbiyəsi və idmana cəlb edilməsinin muxtar respublika rəhbəri tərəfindən daim diqqətdə saxlanılmasıdır.

Zəruri qeyd və yaxud təklif

Hazırda həyata keçirilən Dövlət proqramları bir daha təsdiq edir ki, sağlamlıq imkanları məhdud insanların cəmiyyətin aktiv üzvünə çevrilmələri üçün muxtar diyarımızda hər bir şərait yaradılıb, bu kateqoriyadan olan şəxslərin cəmiyyətə inteqrasiyası, onların istedadlarının üzə çıxarılması və inkişaf etdirilməsi istiqamətində mühüm işlər görülüb. Federasiyalar idmançı bazalarını təkmilləşdirmək, daha təcrübəli idmançıları cəlb etmək üçün bir nüansdan da istifadə edə bilərlər. Bu, daha çox Paralimpiya və Atıcılıq federasiyaları üçün məqsədəuyğun addım ola bilər. Belə ki, 44 günlük Vətən müharibəsində torpaqlarımızın işğaldan azad edilməsində misilsiz rol oynayan igidlərimizi – qazilərimizi federasiyalara dəvət etmək olar. Vətənpərvər ruhda böyüyən və müharibədə böyük şücaət göstərən gənclərimiz – qazilərimiz bundan sonra federasiyaların (xüsusilə atıcılıq) tərkibində idmançı kimi Naxçıvanı ən layiqli şəkildə təmsil edə bilərlər. Bu həm də sağlamlıqlarını Vətən uğrunda, qələbə naminə itirmiş cəsur gənclərin cəmiyyətə inteqrasiyasıdır.

Ceyhun MƏMMƏDOV

 

 

 

Naxçıvan şəhərindəki İlham Əliyev adına Olimpiya İdman Kompleksində “Zərərli vərdişlərə yox deyək, həmişə sağlam olaq!” devizi altında qız və oğlanlar arasında karate-do üzrə Naxçıvan şəhər açıq birinciliyi keçirilib.

Ardını oxu...

Gənclərin intellektual biliklərinin və dünyagörüşlərinin formalaşdırılması, yaradıcılıq bacarıqlarının təkmilləşdirilməsinə stimul yaradılması, asudə vaxtlarının səmərəli təşkili, muxtar respublikamızın turizm imkanlarının onlar arasında tanıdılması və təbliği məqsədilə ötən ay ərzində bir sıra tədbirlər həyata keçirilib. Belə ki, Ağbulaq İstirahət Mərkəzində təşkil olunan 3 günlük “Yay məktəbi”ndə iştirakçılar üçün təlim, konsert proqramı, müxtəlif idman oyunları, müsabiqələr, intellektual yarışlar təşkil olunub və Azərbaycan filmləri nümayiş etdirilib. “Gənclik” Mərkəzində sağlamlıq imkanları məhdud uşaqların iştirakı ilə intellekt yarışı reallaşıb, “İdman və ədalətli oyunlar” mövzusunda respublika rəsm müsabiqəsində Naxçıvan şəhər 12 nömrəli tam orta məktəbin şagirdi İrəm Göktaşın iştirakı təmin olunub, təmsilçimizin ədalətli oyun və humanizm prinsiplərini önə çıxardığı əl işi 3-8 yaş qrupu üzrə III yerə layiq görülüb.

Ardını oxu...

Naxçıvan şəhərindəki İlham Əliyev adına Olimpiya İdman Kompleksində “Zərərli vərdişlərə yox deyək, həmişə sağlam olaq!” devizi altında yeniyetmə və gənclər arasında boks üzrə Naxçıvan şəhər açıq birinciliyi keçirilib.

Ardını oxu...

12 avqust – Beynəlxalq Gənclər Günü münasibətilə təşkil olunan yarış Naxçıvan Olimpiya İdman Kompleksinin Üzgüçülük Mərkəzində reallaşıb. Məktəblilərin yay tətilinin səmərəli təşkilinə nail olmaq, onları sağlam həyat tərzinə uyğunlaşdırmaq və üzgüçülük idman növlərinin inkişafına töhfə vermək məqsədilə keçirilən birincilikdə 20 idmançı iştirak edib. Onlar 2 yaş kateqoriyasında üzgüçülüyün sərbəst üsulu ilə 25 metr məsafə üzrə bacarıqlarını nümayiş etdiriblər.

Yarışın nəticələrinə əsasən 2006-2008-ci il təvəllüdlü üzgüçülər arasında İnci Allahverdiyeva bütün rəqiblərindən üstün olub. Rüqayyə Hacıyeva yarışı ikinci, Almaz Rəsulova isə üçüncü sırada tamamlayıb. 2009-2010-cu il təvəllüdlülərin mübarizəsindən Cansu Bayramova qalib ayrılıb. Alsu Abdullayeva ilə Leyla Yusifova müvafiq olaraq ikinci, üçüncü sıralarda qərarlaşıblar.
Sonda ilk üçlükdəki idmançılara diplom, həvəsləndirici yer tutanlara isə fəxri fərman təqdim edilib.

Naxçıvan Muxtar Respublikası
Gənclər və İdman Nazirliyinin mətbuat xidməti

 

 

 

Serbiyanın Voyevodina muxtar vilayətində şahmat üzrə beynəlxalq açıq çempionat təşkil olunub. 6 gün davam edən “XI Open International Championship of Vojvodina – 2021” yarışına 14 ölkədən, ümumilikdə, 140 idmançı qatılıb. Çempionatın görüşləri iki qrupda oynanılıb. Naxçıvan Şahmat Federasiyasının idmançısı Rza Həsənov 81 iştirakçının qərarlaşdığı “B” qrupunda mübarizə aparıb. Ölkəmizi bu qrupda təmsil edən yeganə şahmatçı 8 görüşdən 5,5 xal (5 qələbə, 1 heç-heçə, 2 məğlubiyyət) toplayıb. Bu nəticə ilə 14 yaşlı şahmatçılar arasında 2-ci olan Rza, reytinq əmsalını da 137 xal artırıb.

Naxçıvan Muxtar Respublikası
Gənclər və İdman Nazirliyinin mətbuat xidməti

İnsan sağlamlığı üçün ən vacib məşğuliyyət sahələrindən biri də idmandır. Uzun illər idmanla məşğul olan insanların cəmiyyət həyatına verdiyi töhfələr də danılmaz faktdır. Eyni zamanda idman insana bir çox müsbət keyfiyyətləri aşılayır, mərdlik, qorxmazlıq, cəsarət, şücaət, Vətənə məhəbbət kimi hisslərin formalaşmasına böyük təsir göstərir. Təsadüfi deyil ki, Naxçıvan Muxtar Respublikasında da idmanın inkişafı həyata keçirilən dövlət siyasətinin mühüm istiqamətlərindən birini təşkil edir. 

Ardını oxu...

Bu yazıda tarixi 1500 il əvvələ gedib çıxan qədim bir oyundan – şahmatdan, onun necə yaranmasından, necə inkişaf etməsindən və hazırkı vəziyyətindən bəhs edəcəyik. Elə isə “imperatorların oyunu” adlandırılan, haqqında yüzlərlə əsərlər yazılan bu oyunun tarixinə nəzər salaq.
Şahmat iki oyunçu arasında oynanılan zəka oyunudur. Bu oyun üçün şahmat taxtası və fiqurların olması kifayətdir. Oyun əvvəlcədən qəbul edilmiş qaydalar əsasında oynanılır. Fiqurların necə hərəkət edəcəyi və özəllikləri bəllidir. Məqsəd öz fiqurlarını hərəkət etdirməklə qarşı tərəfi mat etmək, yəni şahını “ələ keçirməkdən” ibarətdir. Şahmat farsca “şah” və “mat” sözlərindən yaranıb. Mənası isə “hökmdar öldü” deməkdir.

Ardını oxu...

Gənc istedadların xüsusi təqaüdə layiq görülməsi haqqında Naxçıvan Muxtar Respublikası Ali Məclisi Sədrinin müvafiq Sərəncamı ilə Şərur Şəhər Fizika-Riyaziyyat Təmayüllü Liseyin şagirdi Nicat Əlizadə və Naxçıvan şəhər 5 nömrəli tam orta məktəbin şagirdi, şahmatçı Nazlı Hümbətovanın adları Naxçıvan Muxtar Respublikası Gənc İstedadlarının “Qızıl kitabı”na yazıldı və onlar Ali Məclis Sədrinin xüsusi aylıq təqaüdünə layiq görüldülər. Qeyd edim ki, “Qızıl kitab” 2012-ci ildə istedadlı gənclərə dövlət qayğısını daha da artırmaq, onların intellektual və yaradıcılıq potensialını inkişaf etdirmək üçün təsis edilib. Təqaüd təhsil, idman, mədəniyyət, bədii yaradıcılıq və digər sahələrdə fərqlənən 25 yaşadək gənc istedadlara verilir. Bunun sayəsində də gənc nəsil üçün yeni maddi-mənəvi imkanlar, karyera istiqamətləri yaranır. Nəticədə, müxtəlif sahələri əhatə edən sağlam rəqabət mühiti formalaşır, onlar hədəf və məqsədləri yolunda əlavə motivasiya əldə edirlər. 

Ardını oxu...

Naxçıvan Muxtar Respublikası Paralimpiya Federasiyasının idmançıları təlim-məşq toplanışında iştirak edirlər. Belə ki, idmançılarımız qolbol idman növü üzrə baş məşqçi Zahir Abdullayevin rəhbərliyi ilə keçirilən milli komandanın təlim-məşq toplanışına yollanıblar. Azərbaycan Milli Paralimpiya Komitəsi tərəfindən Balakən şəhərində təşkil olunan toplanışa Paralimpiya Federasiyasının qolbol bölməsindən məşqçi-müəllim Turan Hüseynov və 3 paralimpiyaçı – Kamal Yusifli, Qəzənfər Zamanov və Samir İmamquliyev qatılıblar.
10 günlük təlim-məşq toplanışı ərzində “Naxçıvan” və “Bakı” komandaları arasında yoldaşlıq görüşü də təşkil olunub. Oyun muxtar respublika təmsilçisinin qələbəsi ilə başa çatıb.
Toplanış zamanı Qəzənfər Zamanov baş məşqçinin etimadını qazanaraq milli komandamızın heyətinə dəvət olunub.

 Ceyhun MƏMMƏDOV

 

20 iyul Beynəxalq Şahmat Gününə ilə əlaqədar olaraq Naxçıvan Muxtar Respublikası Şahmat Federasiyası tərəfindən bir sıra tədbirlər keçirilib.

Ardını oxu...

Azərbaycanın Milli Qəhrəmanı Yusif Mirzəyevin xatirəsinə həsr olunan kikboksinq üzrə uşaqlar arasında keçirilən Naxçıvan Muxtar Respublika turnirinə yekun vurulub.
Turniri keçirməkdə məqsəd Yusif Mirzəyevin xatirəsinin yad edilməsi, kikboksinq idman növünün muxtar respublikada inkişaf etdirilməsi, yeniyetmə və gənclər arasında təbliği, kikboksinq üzrə fəaliyyət göstərən bölmələrin və klubların işinin təkmilləşdirilməsi, həmçinin bu növün kütləviliyinə nail olunmasından ibarət idi.
Naxçıvan şəhərindəki İlham Əliyev adına Olimpiya İdman Kompleksində keçirilən turnirdə 150-yə yaxın idmançı mübarizə aparıb. Reqlamentə əsasən idmançılar 7-8 (18, 20, 22, 24, 26, 28 və 32 kiloqram), 9-10 (24, 26, 28, 30, 32, 36, 39 və +39 kiloqram) və 11-12 yaş qruplarında (28, 30, 32, 35, 38, 42, 47 və 52 kiloqram) rinqə çıxıblar.
Sonda qaliblər təşkilatçılar tərəfindən mükafatlandırılıblar.

 Ceyhun MƏMMƏDOV

Gündoğan ölkəyə yollanacaq kişi boksçulardan ibarət Azərbaycan milli komandasının heyətində Naxçıvan Muxtar Respublikası Boks Federasiyasının yetirməsi Tayfur Əliyev də yer alıb. İdmançımız ötən il Böyük Britaniyanın paytaxtı Londonda keçirilən Avropa Olimpiya təsnifat turnirində Olimpiadaya lisenziya qazanmışdı. Hazırda dəri əlcək sahibimiz Azərbaycan milli komandasının heyətində İtaliyanın Assizi şəhərindəki Boks Akademiyasında beynəlxalq təlim-məşq toplanışında iştirak edir.

Ardını oxu...

Naxçıvan Muxtar Respublikası Şahmat Federasiyasının yetirmələri Serbiya Respublikasında təşkil olunan beynəlxalq turnirlərdə mübarizə aparıb və uğurlu nəticələr əldə ediblər.
İlk olaraq 5 zəka sahibimiz Silver Leyk şəhərində təşkil olunan “Silver Lake – 2021 Open” beynəlxalq turnirində mübarizə aparıblar. Beynəlxalq turnir “A” və “B” olmaqla, iki qrupa bölünüb. 27 ölkədən 130-dan çox şahmatçının mübarizə apardığı “A” qrupunda iki təmsilçimiz – beynəlxalq usta Toğrul Həsənzadə və FIDE ustası Pərviz Qasımov müvafiq olaraq turnirdə 4 və 5 xal toplamaqla uğurlu nəticə əldə ediblər. 11 ölkənin 100-dən çox zəka sahibinin birincilik uğrunda mübarizə apardığı “B” qrupunda isə Nəsrin Babayeva 9 oyundan 5,5 xal toplayaraq qadınlar arasında qalib adını qazanıb. Yekun turnir cədvəlində ilk üçlükdən cəmi yarım xalla kənarda qalan Sadiq Qarayev isə 18 yaşadək şahmatçılar arasında ikinci olub. Aktivində 5 xalı olan Nazlı Hümbətova reytinq əmsalını 171 xal artırıb.

Ardını oxu...

Ukraynanın Nikolayevski bölgəsində yeniyetmələr, gənclər və böyüklər arasında universal döyüş üzrə dünya kubokuna start verilib.
28 ölkədən 400-ə yaxın idmançının mübarizə apardığı yarışda Azərbaycan milli komandası Əməkdar məşqçi Elşən İsmayılovun rəhbərliyi altında 24 idmançı ilə təmsil olunur. Yığma komandanın heyətində dünya kubokuna qatılan təmsilçilərimizdən biri də Naxçıvan Muxtar Respublikası Kikboksinq Federasiyasının və “Turan” döyüş klubunun idmançısı Sadiq Kərimov olub. O, 11-12 yaş kateqoriyasında 42 kiloqram üzrə mübarizə aparıb.
İdmançımız öncə “Light” versiyasında çıxış edib, Polşa, Özbəkistan və Ukrayna idmançılarına qalib gələrək fəxri kürsünün ən yüksək pilləsinə qalxıb. “Classic” versiyasında isə Sadiq Kərimov finaladək məğlubiyyətsiz irəliləyib. Həlledici görüşdə xal hesabı ilə məğlub olan idmançımız bu versiyada gümüş medal qazanıb. Bununla yeniyetmə idmançımız dünya kubokunu 1 qızıl və 1 gümüş medalla tamamlayıb.
Sonda idmançımız təşkilatçılar tərəfindən mükafatlandırılıb.

 Ceyhun MƏMMƏDOV

Serbiyanın Silver Leyk şəhərində təşkil olunan “Silver Lake – 2021 Open” beynəlxalq turniri bu gün başa çatıb. Turnirdə iştirak edən şahmatçılarımız uğurlu nəticələr göstəriblər. Ən yaxşı göstərici Nəsrin Babayevaya məxsusdur. 99 şahmatçının iştirak etdiyi “B” qrupunda mübarizə aparan yeniyetmə idmançımız 9 oyunda 5,5 xal toplayaraq qadınlar arasında birinci olub. Ümumi sıralamada ilk üçlükdən cəmi yarım xalla kənarda qalan Sadiq Qarayev isə 18 yaşadək şahmatçılar arasında ikinci olub. Aktivində 5 xalı olan Nazlı Hümbətova reytinq əmsalını 171 xal artırıb. A qrupunda yer alan Pərviz Qasımov 5 xal, Toğrul Həsənzadə isə 4 xal toplayıb.
Qeyd edək ki, iyulun 2-də Serbiyada daha bir turnir start götürür. Belqrad şəhərində keçiriləcək “Serbia Chess Open 2021”-də Naxçıvan şahmatçıları da iştirak edəcək. Şahmatçılar “masters” və “amateurs” kateqoriyaları üzrə yarışacaqlar.

Naxçıvan Muxtar Respublikası Gənclər və
İdman Nazirliyinin mətbuat xidməti

Naxçıvan Muxtar Respublikası Şahmat Federasiyasının yetirmələri daha bir böyük beynəlxalq turnirdə mübarizəyə başlayıblar.
Serbiya Respublikasında təşkil olunan “Silver Lake 2021 Open” turnirində 5 zəka sahibimiz – beynəlxalq usta Toğrul Həsənzadə, FIDE ustası Pərviz Qasımov, Sadiq Qarayev, Nəsrin Babayeva və Nazlı Hümbətova iştirak edirlər. Beynəlxalq turnir “A” və “B” olmaqla, iki qrupa bölünüb. 27 ölkədən 130-dan çox şahmatçının mübarizə apardığı “A” qrupunda iki təmsilçimiz – beynəlxalq usta Toğrul Həsənzadə və FIDE ustası Pərviz Qasımov ağ-qara taxta arxasında əyləşiblər. 7 turdan sonra Pərvizin 4,5, Toğrulun isə 3,5 xalı var.

Ardını oxu...

Naxçıvan Muxtar Respublikası Karate-do Federasiyasının təşkilatçılığı ilə muxtar respublikamızda Azərbaycan Milli Karate Federasiyası tərəfindən hakimlik seminarı keçirilib.
Milli Karate Federasiyanın Hakimlər Komitəsinin sədri, beynəlxalq hakim Cahangir Babayevin rəhbərliyi, beynəlxalq hakim Vüqar Kərimovun asissentliyi ilə iki gün davam edən nəzəri və praktiki seminarda 20-dən artıq yerli hakim iştirak edib. Dərəcəsini artıran 6 hakimə - Nəriman Quliyev (II dərəcə), Vüsal Allahverdiyev, Murtuz Abdullayev, Mirpaşa Kərimov, Qələndər Binyətli və İlkin Şirinova (hər biri III dərəcə) müvafiq sertifikatlar təqdim edilib.

Ardını oxu...

ARXİV

Oktyabr 2021
Be Ça Ç Ca C Ş B
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

MÜƏLLİFLƏR

KEÇİDLƏR