Xırdalan şəhərində fəaliyyət göstərən “Zirvə” klubunda ağır atletika üzrə Azərbaycan çempionatının seçmə yarışı keçirilib.
Naxçıvan Muxtar Respublikası Gənclər və İdman Nazirliyinin nəzdində Şərur rayonunda fəaliyyət göstərən Ağır atletika bölməsinin yetirmələri Həsən Babayev və Gülcahan Əliyeva da yarışda iştirak ediblər. 11 yaş qrupunda Həsən Babayev 50 kiloqram çəki dərəcəsində birbaşa qaldırmada 48, təkanla qaldırmada isə 60 kiloqram qaldıraraq I yerə layiq görülüb. 14 yaş qrupunda Gülcahan Əliyeva 48 kiloqram çəki dərəcəsində birbaşa qaldırmada 31, təkanla qaldırmada isə 42 kiloqram qaldıraraq I yerə layiq görülüb. ­Qaliblərə təşkilatçıların diplom və ­medalları təqdim olunub.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Gənclər və İdman Nazirliyi Şərur Rayon İcra Hakimiyyəti ilə birgə rayon mərkəzindəki istirahət parkında şahmat üzrə rayon birinciliyi keçirib.
Naxçıvan şəhərinin 2018-ci ildə ölkəmizin Gənclər Paytaxtı seçilməsi münasibətilə keçirilən tədbirdə Şərur Rayon İcra Hakimiyyətinin başçısı Kamal Cəfərov çıxış edərək bildirib ki, rayonda gənclərin hərtərəfli inkişafı üçün hər cür şərait yaradılıb. Onların bütün idman növlərinə cəlbi istiqamətində atılan addımlar sayəsində uğurlar da ilbəil çoxalır. Bölgədə mütəmadi olaraq şahmat üzrə yarışların təşkil edilməsi bu idman növünə gənclərin böyük maraq göstərməsinə səbəb olub. Təqdirəlayiq haldır ki, rayonun zəka sahibləri ölkə və beynəlxalq səviyyəli yarışlarda muxtar respublikamızı uğurla təmsil edirlər.
Muxtar respublikanın gənclər və idman naziri Azad Cabbarov çıxışında deyib ki, son illərdə muxtar respublikanın şəhər və rayonlarında müasir tələblərə cavab verən şahmat məktəbləri tikilərək istifadəyə verilib, həmin məktəblərin maddi-texniki bazaları gücləndirilib. Bundan əlavə, müasir informasiya-kommunikasiya texnologiyaları ilə təmin olunmuş bu məktəblərdə distant və interaktiv təhsilin təşkili üçün hər cür şərait yaradılıb. Mütəmadi olaraq şəhər və rayonlarda şahmat üzrə yarışların təşkil olunması da Naxçıvanda bu idman növünün kütləviliyinin artırılmasına xidmət edir.
Şərur Rayon Uşaq-Gənclər Şahmat Məktəbinin direktor müavini Musa Məmmədli tədbirin keçirilməsində əməyi keçən hər kəsə iştirakçılar adından minnətdarlıq edib.
Sonra yarışa start verilib. 20-yə yaxın gənc zəka sahibinin iştirakı ilə açıq havada təşkil edilən şahmat yarışı gərgin idman mübarizəsi şəraitində keçib. Şərur Rayon Uşaq-Gənclər Şahmat Məktəbinin yetirmələri İbrahim Orucov I, Turan Qasımov II, Yeganə Əhmədova III və Miryəhya Seyidov isə həvəsləndirici yerlərə layiq görülüblər. Yarışın sonunda qaliblər ­mükafatlandırılıblar.

 Nail ƏSGƏROV

Naxçıvan şəhərindəki İlham ­Əliyev adına Olimpiya-İdman Kom­­pleksində məktəblilərin yay tətilinin səmərəli təşkili məqsədilə yeniyetmə və gənclər arasında boks üzrə Naxçıvan şəhər birinciliyi keçirilib.
Beynəlxalq Boks Federasiyasının qaydalarına uyğun keçirilən birincilikdə 18 çəki dərəcəsində 50-yə yaxın dəri əlcək sahibi qüvvəsini sınayıb. Naxçıvan Şəhər Gənclər və İdman İdarəsi ilə Boks Federasiyasının birgə təşkil etdiyi birinciliyin yekun nəticəsinə əsasən Tural Kərimsoy (28 kilo­qram), Əli Məmmədov (30 kiloqram), Zülfü Tağıyev (32 kiloqram), Ayxan Heydərov (34 kiloqram), Murad Abbas­zadə (36 kiloqram), Nicat İsmayılov (40 kiloqram), Kənan Cəfərli (48 kiloqram), Nizami Novruzov ­­­­­­­ (50 kiloqram), Ələsgər Ələkbərov ­­(52 kiloqram), Hüseyn Hüseynov (54 kiloqram), Murad Rəhimov (55 kiloqram), Həsən Hüseynov (57 kiloqram), Ayxan Süleymanov (58 kiloqram), Nadir Cəfərov (60 kiloqram), Nəriman Nağıyev (61 kiloqram), Kamran Allahverdiyev (63 kiloqram), Pərvin Sadiqov (66 kiloqram) və Həsən Babayev (+70 kiloqram) öz çəki dərəcələrində bütün rəqiblərini üstələyərək qalib adını qazanıblar.
Sonda hər çəki dərəcəsində yer tutan idmançılara diplomlar təqdim olunub.

 Ceyhun MƏMMƏDOV

Bakı şəhərində Azərbaycan Respublikası Karate Federasiyasının və “Arpaçay” Karate Klubunun təşkilatçılığı ilə Milli Qəhrəman Albert Aqarunovun xatirəsinə həsr olunmuş Qara dəniz və Xəzəryanı ölkələrin idmançıları arasında karate üzrə beynəlxalq turnir keçirilib. Turnirdə 5 ölkənin 100 komandasının heyətində 1000 idmançı mübarizə aparıb.
Beynəlxalq turnirdə Naxçıvan Muxtar Respublikası Karate-do Federasiyasının 20 idmançısı iştirak edib.
Yekun nəticəyə əsasən oğlanlar arasında Nicat Allahverdiyev +84 kiloqram çəki dərəcəsində kata üzrə I, kumite üzrə III, Vüsal Seyidov -37 kiloqram çəki dərəcəsində II, Rafiq Hüseynov +23 kiloqram çəki dərəcəsində II, Sərcan Məmmədov -55 kiloqram çəki dərəcəsində II, Həsən Səfərli -23 kiloqram çəki dərəcəsində, Ziya Məmmədli -20 kiloqram çəki dərəcəsində, Qafar Hüseynov -33 kiloqram çəki dərəcəsində və Seyran Quluzadə -43 kiloqram çəki dərəcəsində III yerlərə layiq görülüblər.
Qızların mübarizəsində isə Özləm Hacıyeva -25 kiloqram çəki dərəcəsində I, Aminə Novruzzadə -30 kiloqram çəki dərəcəsində I, Zəhra Məmmədova -25 kiloqram çəki dərəcəsində 2 yaş qrupunda 2 dəfə II, Çinarə Cəlalova +54 kiloqram çəki dərəcəsində III, Rəna Düzənci isə -35 kiloqram çəki dərəcəsində III olublar.
Sonda qalib idmançılarımız təşkilatçılar tərəfindən mükafatlandırılıblar.

Naxçıvan Muxtar Respublikası Gənclər və
İdman Nazirliyinin mətbuat xidməti

Türkiyənin Ordu Böyükşəhir Bələdiyyə İdman Klubunun təşkilatçılığı ilə “Naxçıvan-Ordu dostluq körpüsü” devizi altında keçirilən şahmat üzrə beynəlxalq dostluq turniri başa çatıb.
Ordu şəhərində, ümumilikdə, 56 şahmatçının mübarizə apardığı turnirdə Naxçıvan Muxtar Respublikası Şahmat Federasiyasının 20 şahmatçısı və 3 məşqçi-müəllimi iştirak edib. Zəka sahiblərimiz turnirdə yüksək nəticələr göstəriblər.
Belə ki, cəmi 9 turdan ibarət olan turnirin yekun nəticəsinə əsasən Sadiq Qarayev qalib adını qazanıb. Digər idmançımız Əli Əliyev isə ikinci olub, Əsgər Əsgərov turnirin azyaşlı şahmatçısı kimi medalla təltif edilib.

Naxçıvan Muxtar Respublikası Gənclər və
İdman Nazirliyinin mətbuat xidməti