28 May 2020, Cümə axşamı

AMEA Naxçıvan Bölməsində “Azərbaycanlılara qarşı həyata keçirilən soyqırımı siyasəti” mövzusuna həsr olunmuş elmi konfransda əvvəlcə faciə qurbanlarının və Vətən uğrunda həlak olanların xatirəsi bir dəqiqəlik sükutla yad edilib.
Tədbirdə bölmənin sədri, akademik İsmayıl Hacıyev Azərbaycan torpaqlarında ermənilər tərəfindən törədilən faciələrin mahiyyətindən, miqyasından, məqsəd və nəticələrindən danışıb. Bildirib ki, “Böyük Ermənistan” yaratmaq xülyası ilə yaşayan ermənilər öz çirkin məqsədlərinə çatmaq üçün böyük dövlətlərin dəstəyi ilə azərbaycanlılara qarşı tarixdə mərhələlərlə vəhşiliklər törədiblər.
Qeyd olunub ki, 1918-ci ilin mart ayında ermənilər tərəfindən Bakı ilə yanaşı, Şamaxıda, Qubada, Qarabağda, Naxçıvanda, Zəngəzurda və digər bölgələrdə dinc əhaliyə qarşı tarixdə görünməmiş kütləvi qətl və qırğınlar törədilib, xalqımıza məxsus minlərlə tarixi-mədəni abidə və yaşayış yerləri talan edilib.
Vurğulanıb ki, ümummilli lider Heydər Əliyevin 1998-ci il 26 mart tarixdə “Azərbaycanlıların soyqırımı haqqında” imzaladığı Fərman soyqırımı həqiqətlərinin bütün dünya ictimaiyyətinə çatdırılması baxımından xüsusi əhəmiyyət kəsb edən bir sənəddir. Bununla yanaşı, Prezident cənab İlham Əliyevin “1918-ci il Azərbaycanlıların soyqırımının 100 illiyi haqqında” 2018-ci il 18 yanvar tarixli Sərəncamı yüz illərlə xalqımıza qarşı törədilən qəddar cinayətlərin öyrənilməsi və təbliği baxımından əvəzsiz tarixi-siyasi əhəmiyyətə malikdir.

Tədbirdə bölmənin Tarix, Etno­qrafiya və Arxeologiya İnstitutunun şöbə müdiri, dosent Emin Şıxəliyev “XX əsrdə azərbaycanlılara qarşı törədilən soyqırımı cinayətləri və onların mahiyyəti”, həmin institutun aparıcı elmi işçisi, dosent Musa Quliyev “1918-1920-ci illərdə ermənilərin Naxçıvanda törətdiyi faciələr”, şöbə müdiri, dosent İlhami Əliyev “Ümummilli lider Heydər Əliyev və azərbaycanlıların soyqırımı və deportasiyası məsələsi”, şöbə müdiri, dosent Toğrul Xəlilov “1948-1953-cü illərdə azərbaycanlıların tarixi torpaqlarından deportasiyası və onun acı nəticələri” və İncəsənət, Dil və Ədəbiyyat İnstitutunun Folklorşünaslıq şöbəsinin müdiri, dosent Elxan Məmmədov “Azərbaycanlıların soyqırımı: alın yazısından elin yazısına” mövzularında məruzələrlə çıxış ediblər.
Konfransda 31 Mart – Azərbaycanlıların Soyqırımı Günü və Xocalı soyqırımına aid real faktları əks etdirən fotoşəkillər və sənədlərdən ibarət videoçarx nümayiş etdirilib, kitab sərgisi təşkil olunub.

*  *  *

“31 Mart – bəşəriyyətin ən böyuk soyqırımıdır” adlı elmi-praktik konfrans keçirilib.
Naxçıvan Dövlət Universitetində keçirilən konfransdan əvvəl universitetin İncəsənət fakültəsində mart soyqırımına həsr olunmuş 20-dən çox sənət əsərindən ibarət sərgiyə baxış olub. Faciə qurbanlarının əziz xatirəsi bir dəqiqəlik sükutla yad edildikdən sonra Azərbaycan Respublikasının Dövlət Himni səsləndirilib.
Universitetin rektoru, AMEA-nın müxbir üzvü Saleh Məhərrəmov konfransda çıxış edərək erməni daşnaklarının xalqımızın başına gətirdiyi bəlalardan danışıb. Qeyd edib ki, 1998-ci il martın 26-da ümummilli lider Heydər Əliyevin imzaladığı “Azərbaycanlıların soyqırımı haqqında” Fərman erməni millətçilərinin cinayətkar əməllərinə verilən dolğun və hərtərəfli siyasi qiymət olub.
Azərbaycan tarixi kafedrasının dosenti, tarix üzrə fəlsəfə doktoru Elçin Zamanov mart soyqırımının azərbaycanlıların milli müstəqillik mübarizəsinə qarşı bolşevik-erməni planı olduğunu vurğulayaraq ermənilərin 1918-ci ilin martında Bakıda, Qubada, Şamaxıda, Naxçıvanda və digər bölgələrdəki vəhşiliklərindən danışıb. Bildirilib ki, 520 min türk-müsəlman əhali erməni soyqırımına məruz qalaraq məhv edilib.
Sonda mövzu ilə bağlı videoçarx izlənilib.

*  *  *

Naxçıvan Müəllimlər İnstitutunda “31 Mart Azərbaycanlıların Soyqırımı Günüdür” mövzusunda elmi-praktik konfrans keçirilib.
Konfransı ali təhsil ocağının rektoru, dosent Elbrus İsayev açıb. O bildirib ki, 1918-ci ilin mart qırğınları ermənilərin azərbaycanlılara qarşı düşünülmüş, planlı şəkildə həyata keçirdikləri soyqırımı siyasətinin mərhələlərindən biridir. Təəssüf ki, uzun illər bu soyqırımı ­siyasi-hüquqi qiymətini almayıb. Yalnız ulu öndər Heydər Əliyevin yenidən hakimiyyətə qayıdışından sonra bu məsələyə prinsipial yanaşma nümayiş etdirilib, erməni millətçilərinin xalqımıza qarşı illərlə reallaşdırdıqları soyqırımı və deportasiya siyasətinin mahiyyəti bütünlüklə açıqlanıb və ifşa olunub. Ümummilli liderimizin “Azərbaycanlıların soyqırımı haqqında” 1998-ci il 26 mart tarixli Fərmanı ilə hər il respublikamızda 31 Mart – Azərbaycanlıların Soyqırımı Günü kimi qeyd olunur, soyqırımı qurbanlarını anma tədbirləri keçirilir. Azərbaycan Respublikasının Prezidenti cənab İlham Əliyevin 2018-ci il 18 yanvar tarixdə imzaladığı “1918-ci il azərbaycanlıların soyqırımının 100 illiyi haqqında” Sərəncam isə ulu öndərin siyasətinin uğurla davam etdirilməsinin növbəti ifadəsidir.
Konfransda institutun müəllimi Arzu Abdullayev “Soyqırımı hadisələri və Naxçıvan”, Pedaqoji fakültənin dekanı Arif Ağalarov “Tarixdə və günümüzdə erməni vəhşilikləri” mövzularında məruzələr ediblər.
Sonda müəllim və tələbələrin hazır­ladıqları təsviri və tətbiqi sənət nümunələrindən ibarət sərgiyə baxış olub.

*  *  *

“Naxçıvan” Universitetində “Azərbaycanlılara qarşı törədilmiş soyqırımların səbəb, nəticə və ibrət dərsləri” mövzusunda elmi konfrans keçirilib. Konfransda əvvəlcə soyqırımı faciəsi qurbanlarının, torpaqlarımızın azadlığı və dövlət müstəqilliyimizin qorunması uğrunda canlarından keçən şəhidlərimizin əziz xatirələri bir dəqiqəlik sükutla yad edilib. Rektor, professor İsmayıl Əliyev çıxış edərək ermənilərin xalqımıza qarşı törətdikləri soyqırımı aktının acı nəticələrindən və 70 illik sovet imperiyası rejiminin tarixi cinayətin ört-basdır edilməsi üçün həyata keçirdiyi məkrli siyasətdən danışıb.
Ümumi tarix kafedrasının dosenti Elçin Zamanovun “XX əsrin əvvəllərində Zaqafqaziyada yeni tarixi mərhələnin başlanğıcı: Türk ­müsəlmanlara qarşı həyata keçirilən soyqırımların tarixi kontekstdə təhlili” mövzusunda çıxışı dinlənilib.
Konfrans 31 Mart – Azərbaycanlıların Soyqırımı Günü ilə bağlı videoçarxın nümayişi ilə başa çatıb.

Xəbərlər şöbəsi

ARXİV

May 2020
Be Ça Ç Ca C Ş B
27 28 29 30 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

MÜƏLLİFLƏR

KEÇİDLƏR