Dünya Azərbaycanlılarının Həmrəylik Günü və Yeni il bayramları münasibətilə Naxçıvan şəhərindəki Mərkəzi bazarda bayram yarmarkası təşkil olunmuşdur.
Dekabrın 29-da Naxçıvan Muxtar Respublikası Ali Məclisinin Sədri Vasif Talıbov yarmarkaya gəlmiş, yaradılan şəraitlə maraqlanmışdır.
Məlumat verilmişdir ki, yarmarkaya muxtar respublikamızın özəl müəssisələrində istehsal olunmuş sənaye və ərzaq malları, ayrı-ayrı rayonlardan gətirilmiş kənd təsərrüfatı məhsulları çıxarılmışdır. Bayram günlərində əhalinin tələbatını ödəmək və daha ucuz qiymətə məhsulların satışını təşkil etmək məqsədilə keçirilən yarmarkada torpaq mülkiyyətçiləri və sahibkarlar üçün ayrıca satış yerləri ayrılmışdır. Satışa çıxarılan məhsullar sanitar-gigiyena nəzarətindən keçirilmiş, ət və süd məhsullarında baytarlıq müayinəsi aparılmışdır.

 

“2012-2015-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Pro­qramı”nda nəzərdə tutulan tədbirlərin uğurlu icrası nəticəsində muxtar respublikada meyvə və tərəvəz məhsullarının istehsalı xeyli genişləndirilmişdir. Bayram yarmarkasında da yerli meyvə və tərəvəz məhsulları bolluq təşkil edirdi. Həmçinin yarmarkaya muxtar respublikada istehsal edilən keyfiyyətli şirniyyatlar, müxtəlif meyvə quruları, balıq və süd məhsulları da çıxarılmışdı.
Yaradılan nümunəvi şəraitin nəticəsində muxtar respublikamızın bütün bölgələrində yaşayan torpaq mülkiyyətçiləri, sahibkarlar istehsal etdikləri müxtəlif kənd təsərrüfatı və sənaye məhsullarını yarmarkaya çıxararaq rahatlıqla satırlar. Bu, əhalinin istehlak mallarına olan tələbatının daha dolğun ödənilməsinə şərait yaradır.
Bayram yarmarkasına muxtar respublika üzrə, ümumilikdə, 179 təsərrüfat subyekti tərəfindən 96 adda, 173 çeşiddə məhsul çıxarılmış və məhsullar orta bazar qiymətlərindən 15-20 faiz ucuz satılmışdır.
Ali Məclisin Sədri yarmarkaların davam etdirilməsi barədə tapşırıq vermişdir.

Naxçıvan Muxtar Respublikası
Ali Məclisinin mətbuat xidməti