Babək rayonunda yanğın-taktiki təlim keçirilib

Naxçıvan Muxtar Respublikası Fövqəladə Hallar Nazirliyinin Dövlət Yanğından Mühafizə İdarəsinin Naxçıvan Şəhər, Babək Rayon Dövlət Yanğından Mühafizə hissələrinin və Xüsusi Riskli Xilasetmə Xidmətinin Babək rayon xilasetmə bölməsinin qüvvələrinin iştirakı ilə yanğın-taktiki təlim keçirilib.

"Şərq qapısı" xəbər verir ki, “İnzibati binalarda baş verən yanğınların söndürülməsi, xəsarət alanların axtarışı və xilas edilməsi” mövzusunda keçirilən təlimin məqsədi yanğın baş verdikdə əraziyə cəlb olunan xilasetmə qüvvələrinin qarşılıqlı fəaliyyətinin daha da təkmilləşdirilməsi, obyektlərdə mümkün yanğınların söndürülməsi və xilasetmə üzrə şəxsi heyətin peşəkar bacarıqlarının gücləndirilməsindən ibarət olub.

Təlim zamanı şərti yanğın baş verən ərazidə təxliyə planına uyğun olaraq işçilərin təhlükəsiz yerə təxliyəsi həyata keçirilib, şərti xəsarət alan şəxslərə “ilkin yardım göstərilib” və “yanğın qısa müddətdə söndürülüb”.

Uğurla keçən təlimdən sonra əldə edilən nəticələr müzakirə olunub, müvafiq tapşırıqlar verilib.