NAXÇIVAN :

22 Avqust 2026, Şənbə

Bu gün təməli qoyulan binalar sabah insanların həyatına çevriləcək

...

Prezident İlham Əliyevin Naxçıvana 17-ci səfəri çərçivəsində Naxçıvan şəhərinin sabahına doğru atılan mühüm addımlardan birinin əsası qoyuldu. 518 mənzildən ibarət yeni sosial yaşayış kompleksi təkcə yeni binaların ucaldılacağı bir ərazi deyil, yüzlərlə ailənin həyatına çevriləcək yaşayış məkanı olacaq. Təxminən, 5 hektarlıq ərazidə 6 və 7 mərtəbəli 16 yaşayış binasının inşası ilə yanaşı, insanların gündəlik ehtiyaclarını qarşılayacaq sosial və məişət infrastrukturu da yaradılacaq.

Bu layihənin əhəmiyyətini yalnız tikiləcək binaların sayı ilə ölçmək olmaz. Çünki bu gün təməli qoyulan hər bina sabah bir ailənin evi, bir uşağın böyüyəcəyi, insanların öz xatirələrini yaradacağı məkana çevriləcək. Bu baxımdan, kompleks Naxçıvan şəhərinin gələcək simasına əlavə olunan yeni bir səhifədir.

Mənzillərin bölgüsünə nəzər saldıqda da müxtəlif ailələrin ehtiyaclarının nəzərə alındığı görünür. Burada 93 birotaqlı, 37 ikiotaqlı, 351 üçotaqlı və 37 dördotaqlı mənzil olacaq. Üçotaqlı mənzillərin çoxluq təşkil etməsi daha geniş ailə tərkibinə malik sakinlər üçün uyğun yaşayış imkanlarının yaradılmasına, birotaqlı və ikiotaqlı mənzillər isə daha kiçik ailələr, o cümlədən gənc ailələr üçün seçim imkanlarının genişlənməsinə xidmət edəcək.

Layihənin ən maraqlı tərəflərindən biri “sosial mənzil” anlayışının yalnız mənzilin özündə tamamlanmamasıdır. Çünki insanın rahatlığı təkcə evinin qapısından içəri keçəndə başlamır. Yaşadığı ərazidə uşağını aparacağı bağçanın, gündəlik ehtiyaclarını qarşılayacağı iaşə və xidmət obyektlərinin olması da vacibdir. Kompleksdə məhz bu imkanların yaradılması nəzərdə tutulur.

Ərazinin mühəndis-kommunikasiya təminatı da layihənin əsas hissələrindəndir. Elektrik enerjisi, təbii qaz, içməli su və kanalizasiya xətləri çəkiləcək. Beləliklə, yeni mənzillərlə yanaşı, onların normal fəaliyyəti üçün zəruri kommunal sistemlər də əvvəlcədən formalaşdırılacaq.

Kompleksdə daxili yolların və səkilərin salınması, ərazinin yaşıllaşdırılması, sakinlərin istirahəti üçün məkanların yaradılması da nəzərdə tutulur. Bütün bunlar yaşayış binalarını bir-birindən ayrı tikililər kimi deyil, insanların rahat hərəkətini, istirahət etməsini və vaxt keçirməsini vahid bir məkanın tərkib hissəsinə çevirəcək.

Əslində, bu layihəni Naxçıvanda son dövrlərdə gedən böyük dəyişikliklərin fonunda da qiymətləndirmək olar. Nəqliyyat-logistika, “yaşıl enerji” və digər sahələrdə həyata keçirilən layihələr şəhərin yalnız bu gününü deyil, sabahını da formalaşdırır. Yeni yaşayış massivlərinin yaradılması isə həmin dəyişikliklərin insanların gündəlik həyatına birbaşa toxunan tərəfidir. Bu baxımdan, yeni kompleks Naxçıvan şəhərinin ümumi inkişafından ayrı düşünülmür. Burada mənzil, sosial obyektlər və kommunal imkanların bir yaşayış mühiti kimi nəzərdə tutulması şəhərin gələcək inkişafına uyğun yaşayış məkanının formalaşmasına xidmət edəcək.

Kompleks istifadəyə verildikdə yüzlərlə ailə üçün, sadəcə, yeni mənzillərin qapıları açılmayacaq. Həmin qapıların arxasında yeni həyatların başlanğıcı, yeni ailə xatirələri, uşaqların böyüdüyü evlər olacaq. İllər sonra bu binalara baxanda Naxçıvanın dəyişən simasında bu gün qoyulan təməlin izlərini görəcəyik. Layihənin əsl dəyəri də məhz bundadır: bu gün təməli qoyulan evlər sabah insanların həyatına çevriləcək.

Zəhra VƏLİYEVA

Nəşr edilib : 22.08.2026 13:55