NAXÇIVAN :

18 May 2025, Bazar

Canını Vətən üçün fəda edən Fərhad Mirzəyev

...

XX əsrin sonlarında ermənilərin Azərbaycan torpaqlarına ardı arası kəsilməyən hücumları davam edirdi. “Qarabağ”da vətənin bütövlüyü və  suverenliyi  uğrunda  gedən döyüşlər Azərbaycanın dilbər guşəsi olan Naxçıvana da təsirsiz ötüşməyib. İgidlər oylağı Naxçıvan  özünün  igid  oğulları  ilə  birgə  düşmən  təcavüzünün, düşmən təxribatının qarşısını  almaq  üçün səfərbər  olmuşdular. Naxçıvan igidləri vətənin müdafiəsinə qalxaraq igidlik göstərmişdir. Sədərək istiqamətindən ağır silahlar və döyüş texnikası ilə hücuma keçən düşmən Azərbaycan əsgərlərinin və yerli əhalinin ciddi müqaviməti ilə rastlaşdı. Həmin gün qeyri bərabər döyüşdə, Sədərəkdə 19-20 yaşlı gənclər qəhrəmanlıq tarixi yazdılar. Naxçıvandan bir qarış belə torpaq ermənilərə verilmədi. Qəhrəmanlıq göstərənlərdən biri də Fərhad Səyyad oğlu Mirzəyevdir. 
Fərhad Mirzəyev 1972-ci il oktyabrın 17-də Naxçıvan Muxtar  Respublikasının  Şərur  rayonunun  Püsyan kəndində  anadan  olmuşdur. Fərhad 1978-ci ildə Şərur rayon Məmməd  Əsgərov  adına  Püsyan  kənd   orta mətkəbinin  1-ci  sinfinə daxil olmuş, 1988-ci  ildə  həmin  məktəbi  bitirdikdən sonra 1990-cı   ildə  vətənin  odlar içində  yandığı  dövürdə  öz  vətən  borcunu yerinə  yetirmək  üçün  ordu sıralarına daxil olmuşdur. “N” saylı hərbi hissədə  hərbi xidmətə başlayan Fərhad, keçilməz qala  Sədərəkdə gedən  döyüşlərdə  öz  döyüş  yoldaşları  ilə birlikdə qəhrəmancasına vuruşurdu. Vətənpərvərliyi, cəsarəti və əzmkarlığı ilə  komandirlərinin və yoldaşlarının böyük rəğbətini  qazanmışdı. Düşmənə bir qarış torpaq verməkdənsə öz şirin canlarını verən  vətənin qeyrətli oğullarından  biri də  Fərhaddır.
Fərhad Mirzəyev Azərbaycan  Respublikasının  ərazi  bütövlüyü, suverenliyi  uğrunda  gedən  döyüşlərdə  düşmən  təxribatının  qarşısını  alarkən 1992- ci  il  may ayının  18-də  qəhrəmancasına şəhid  olmuşdur. Erməni təcavüzü nəticəsində şəhid olanların bir neçəsinin cəsədi düşmənlə yaxın təmas xəttində qalmışdı. Ümummilli Lider Heydər Əliyevin beynəlxalq səviyyədə apardığı danışıqlar nəticəsində həmin döyüşçülərin nəşi götürülərək şəhidlər xiyabanında dəfn edilib. Şəhid Mirzəyev Fərhad Səyyad oğlununda nəşi Naxçıvan şəhər Şəhidlər xiyabanında dəfn edilmişdir.

     Səfər Əliyev

AMEA Naxçıvan Bölməsinin Əməkdaşı
                                                                                                           

Nəşr edilib : 18.05.2025 11:17