Azərbaycan Respublikasının Prezidenti İlham Əliyev martın 12-də Bakıda işə başlayan “Keçid dövründə olan dünyada fikir ayrılıqlarının aradan qaldırılması” mövzusunda XIII Qlobal Bakı Forumunda çıxış edərək müasir beynəlxalq münasibətlər sistemində təhlükəsizlik, sabitlik və sülh məsələlərinin xüsusi əhəmiyyət kəsb etdiyini vurğulayıb. Dövlət başçısı qeyd edib ki, hazırkı qlobal şəraitdə təhlükəsizlik və müdafiə məsələləri hər bir ölkənin gündəliyində əsas prioritet olmalıdır.

Prezident İlham Əliyevin sözlərinə görə, son illərdə dünyada baş verən hadisələr göstərir ki, təhlükəsizlik təmin edilmədən inkişaf və tərəqqidən danışmaq mümkün deyil. Çünki təhlükəsizlik və sabitlik olmadan iqtisadi inkişaf, sosial rifah və beynəlxalq əməkdaşlıq kimi məsələlər öz əhəmiyyətini itirir.

Azərbaycanın təhlükəsizlik və suverenlik təcrübəsi

Dövlət başçısı çıxışında Azərbaycanın son onilliklərdə keçdiyi tarixi yolu xatırladaraq qeyd edib ki, regional təhlükəsizlik məsələsi ölkəmiz üçün hər zaman prioritet olub. Uzun illər ərzində Azərbaycan ərazilərinin işğal altında qalması ölkəmiz üçün ən ciddi təhlükəsizlik problemi idi.

Prezident İlham Əliyev vurğulayıb ki, Azərbaycan öz suverenliyini və ərazi bütövlüyünü beynəlxalq hüququn prinsiplərinə uyğun olaraq bərpa edib. BMT Nizamnaməsinin özünümüdafiə hüququnu nəzərdə tutan maddəsinə əsaslanaraq Azərbaycan 2020-ci ildə 44 günlük Vətən müharibəsi ilə işğal altındakı ərazilərini azad edib.

Dövlət başçısı qeyd edib ki, bu proses müasir tarixdə nadir hallardan biridir: ölkə əvvəlcə hərbi güc tətbiq etməklə suverenliyini bərpa edib, daha sonra isə siyasi yollarla sülhə nail olub.

Sülhə aparan yol və yeni regional reallıqlar

Prezident İlham Əliyev çıxışında xüsusi olaraq vurğulayıb ki, Azərbaycan bu gün artıq sülh şəraitində yaşayır və bu sülhün üstünlükləri artıq hiss olunmaqdadır. Ermənistanla əldə olunmuş sülh sazişinin paraflanmasından yeddi ay keçdiyini qeyd edən dövlət başçısı bildirib ki, bu müddət ərzində sərhədlərdə sabitlik hökm sürür və regionda yeni əməkdaşlıq imkanları yaranır.

Azərbaycanın sülhə sadiqliyinin konkret addımlarla sübut olunduğunu deyən Prezident İlham Əliyev bildirib ki, ölkəmiz Ermənistanla ticarət əlaqələrinin bərpasına başlayıb, bu ölkə üçün mühüm olan neft məhsullarının ixracını təmin edib və tranzit daşımalar üçün məhdudiyyətləri aradan qaldırıb.

Dövlət başçısı vurğulayıb ki, Azərbaycan sülhə yalnız sənədlər üzərində deyil, real həyatda nail olub və bu, beynəlxalq ictimaiyyət üçün mühüm təcrübədir.

Enerji təhlükəsizliyi – qlobal sabitliyin əsas amillərindən biri

Prezident İlham Əliyev çıxışında enerji təhlükəsizliyinin müasir dövrdə ölkələrin milli təhlükəsizliyinin ayrılmaz hissəsinə çevrildiyini qeyd edib. Azərbaycanın enerji siyasətinin uzunmüddətli sabitliyə və bazar balansının qorunmasına yönəldiyini bildirən dövlət başçısı vurğulayıb ki, ölkəmiz neft, qaz, elektrik enerjisi və neft-kimya məhsullarının istehsalı və ixracı ilə qlobal enerji təhlükəsizliyinə mühüm töhfə verir.

Qeyd olunub ki, hazırda Azərbaycan qazını 16 ölkə boru kəmərləri vasitəsilə alır və bu göstəriciyə görə Azərbaycan dünyada aparıcı mövqelərdən birini tutur. Ölkəmiz, həmçinin enerji bazarında sabit qiymətlərin qorunması və enerji bazarının balanslaşdırılması istiqamətində fəal mövqe nümayiş etdirir.

Azərbaycanın strateji nəqliyyat və logistika rolu

Prezident İlham Əliyev çıxışında Azərbaycanın qlobal nəqliyyat marşrutlarında oynadığı mühüm rolu da xüsusi vurğulayıb. Dövlət başçısının sözlərinə görə, Azərbaycan Şərq-Qərb və Şimal-Cənub Beynəlxalq Nəqliyyat dəhlizləri üzrə mühüm strateji tərəfdaşdır.

Ölkəmiz son illərdə nəqliyyat və logistika infrastrukturu sahəsinə böyük investisiyalar yatıraraq regionun əsas tranzit mərkəzlərindən birinə çevrilib. Bu gün Azərbaycan ərazisində hər iki dəhliz üzrə əsas infrastruktur layihələri tamamlanıb və tranzit daşımaların həcmi sürətlə artır.

Prezident İlham Əliyev qeyd edib ki, Ermənistanla sülh əldə edildikdən sonra Orta Dəhlizin yeni istiqamətinin yaradılması üzərində iş aparılır. Bu layihə Azərbaycanın əsas hissəsi ilə Naxçıvan Muxtar Respublikasını nəqliyyat, enerji və kommunikasiya xətləri vasitəsilə birləşdirəcək.

Qlobal Bakı Forumu – dialoq və əməkdaşlıq platforması

Prezident İlham Əliyev çıxışında XIII Qlobal Bakı Forumunun beynəlxalq dialoq üçün mühüm platformaya çevrildiyini də qeyd edib. Dünyanın müxtəlif ölkələrindən dövlət və hökumət başçıları, siyasətçilər və ekspertlərin iştirak etdiyi forum qlobal çağırışların müzakirəsi üçün əhəmiyyətli imkan yaradır.

Dövlət başçısı bildirib ki, müasir dünyada yaranan yeni gərginlik ocaqları, beynəlxalq hüquqa hörmətin azalması və geosiyasi rəqabətin güclənməsi fonunda bu cür platformalar xüsusi əhəmiyyət kəsb edir.

Prezident İlham Əliyevin sözləri ilə desək, sülhə nail olmaq və onu qorumaq bəzən uzun və çətin proses olsa da, sülhün alternativi yoxdur. Azərbaycanın keçdiyi yol isə göstərir ki, güclü siyasi iradə, beynəlxalq hüquqa hörmət və regional əməkdaşlıq vasitəsilə sabitlik və sülh təmin oluna bilər.

Xəzəngül Orucova

Naxçıvan Muxtar Respublikası Ali Məclisinin deputatı