NAXÇIVAN :

29 Aprel 2026, Çərşənbə

Qələbənin beşilliyi: Azərbaycan xalqının qüdrəti, birliyi və gələcəyə doğru addımlar

...

Böyük Qələbəmizdən beş il ötür, amma bu illər ərzində qazandığımız uğurlar, birliyimiz və milli kimliyimizin qorunması ilə bağlı sərgilədiyimiz iradə hər zaman yaddaşımızda təzə qalır. 8 noyabr 2020-ci il tarixdə əldə etdiyimiz zəfər təkcə Azərbaycan xalqının qələbəsi deyil, həm də bir millətin bir araya gəlmə gücünün rəmzi oldu. O gün hər birimiz bir yumruq kimi birləşdik.

Qarabağ torpaqları uğrunda canını fəda edən şəhidlərimizin xatirəsi hər an ürəyimizdə yaşayır, qazilərimizin cəsarəti və xalqımızın iradəsi bizim ən böyük gücümüzdür.

Qazanılan qələbədən sonra qarşımıza çıxan imkanlar, qarşıya qoyduğumuz məqsədlər və həyata keçirdiyimiz layihələr bu günün həsrətindən doğan yeni üfüqlərdir. Azərbaycanın azad edilmiş torpaqlarında gedən bərpa və yenidənqurma işləri təkcə fiziki deyil, həm də mənəvi dirçəlişin, mədəniyyətin və millətimizin yüksəlişinin ifadəsidir. Prezident İlham Əliyevin rəhbərliyi ilə başlanan “Böyük Qayıdış” proqramı yalnız torpaqlarımıza deyil, həm də xalqımıza olan ehtiramın, hər bir azərbaycanlının həmrəyliyinin təcəssümüdür. İndi Qarabağ və Şərqi Zəngəzurda yüksələn binalar, çəkilən yollar, açılan məktəblər, ucalan mədəniyyət ocaqları yeni həyatın simvoludur.

Şəhidlərimizin qanı, qazilərimizin itirdikləri sağlamlıqları bahasına qazandığımız zəfər Azərbaycanın daha möhkəm, daha güclü və daha müstəqil bir dövlət olduğunu dünya bir daha tanıtdı. Xarici siyasətimiz, uğurlu diplomatiya və dövlətimizin mövqeləri beynəlxalq aləmdə etibar qazanmış, Azərbaycanı dünyaya miqyasında söz sahibinə çevirmişdir. Biz öz haqq işimizi həm döyüş meydanında, həm də diplomatik cəbhədə ləyaqətlə müdafiə edirik və bu bizə yalnız regional deyil, həm də qlobal səviyyədə uğurlar gətirir.

Azərbaycanın gücü təkcə hərbi müstəvidə deyil, həm də iqtisadi, siyasi və mədəni sahələrdə özünü göstərir. Dövlətimizin həyata keçirdiyi layihələr, o cümlədən Qarabağda və Şərqi Zəngəzurda irəliləyən infrastruktur və ekoloji layihələr bizə güclü və sağlam bir gələcək vəd edir. Həmçinin Azərbaycanın beynəlxalq təşkilatlarda ardıcıl və prinsipial mövqeyini nümayiş etdirməsi, öz milli maraqlarını qoruması, ədalətin və sülhün təmsilçisi kimi çıxış etməsi xalqımızın şüurunda dərin izlər buraxır.

Zəfər, sadəcə, bir qələbə deyil, həm də bir xalqın, bir dövlətin böyük bir dönüşüm prosesidir. Qarabağ və Şərqi Zəngəzurda həyatın yenidən doğulması, bu torpaqların inkişafı və sülhün təmin edilməsi bizim gələcəyə inamımızın möhkəmlənməsinə xidmət edir.

Bu gün biz zəfərin simvolu olan üçrəngli bayrağımız altında qürurla yaşasaq da, heç vaxt bu zəfəri əldə etməyimizin qiymətini unutmamalıyıq. Bu qələbə Azərbaycan xalqının birliyinin, əzminin və milli iradəsinin nəticəsidir. Zəfərimizin 5 illiyi bir daha sübut edir ki, xalq-dövlət birliyi ilə hər bir məqsəd əlçatandır. Gələcək nəsillər bu zəfəri yalnız tarixi bir an kimi deyil, həm də bir millətin gücünü, həmrəyliyini və azadlıq mübarizəsini əks etdirən bir simvol olaraq qiymətləndirəcəkdir.

Bu gün biz qalib xalqın nümayəndəsiyik və bu da bizim həm fəxrimiz, həm də məsuliyyətimizdir. Azərbaycan güclüdür, müstəqildir və hər zaman qələbə üçün irəliləyəcəkdir. Bu zəfər yalnız bir dövrün, bir hadisənin simvolu deyil, həm də Azərbaycan xalqının əzminin və gələcəyə olan güvəninin əbədi rəmzidir.

Xəzəngül ORUCOVA 

Naxçıvan Muxtar Respublikası Ali Məclisinin deputatı

Nəşr edilib : 07.11.2025 09:42